Դատավոր Արտուշ Գաբրիելյանի գործով երկու անձ կալանավորվել է՝ կաշառք տալու և օժանդակելու մեղադրանքով
Դատավոր Արտուշ Գաբրիելյանի գործի շրջանակում երկու անձ կալանավորվել է։ Կալանավորված երկու անձանցից մեկը դատավորի օգնականն է, որը մեղադրվում է կաշառքի օժանդակության մեջ, իսկ կալանավորված մյուս անձն, ըստ քրեական գործի, կաշառք տվողն է։
Ըստ գործի նախնական տվյալների՝ Արտուշ Գաբրիելյանը կաշառք է ստացել իր վարույթում գտնվող քրեական գործերից մեկի քննությունը դիտավորյալ ձգձգելու նպատակով։ Գործի նման ընթացքի նպատակը մեղադրյալին պատասխանատվության ենթարկելու վաղեմության ժամկետի լրանալն է, ինչն ըստ իրավապահների՝ փաստացի կբացառեր դատավարական հետևանքները։
Նշենք, որ ապրիլի 29-ին Հակակոռուպցիոն կոմիտեի քննիչները խուզարկություն են իրականացրել Արտուշ Գաբրիելյանի աշխատասենյակում։
Խուզարկությունից հետո Հայաստանի գլխավոր դատախազը միջնորդություն է ներկայացրել Բարձրագույն դատական խորհրդին՝ դատավորի նկատմամբ քրեական հետապնդում հարուցելու և նրան ազատությունից զրկելու թույլտվություն ստանալու նպատակով։
ԲԴԽ-ն այս պահին քննարկում է դատախազության միջնորդությունը։ Դատավորի նկատմամբ գործի հարուցումը և կալանքի հարցը կախված կլինի այդ ընթացակարգից։ Հավելենք, որ պաշտոնական հաստատում կամ մեկնաբանություն Արտուշ Գաբրիելյանի կամ նրա պաշտպանական կողմի կողմից այս պահի դրությամբ հասանելի չէ։