Գյումրու շատրվանների սկանդալային «երգը». քաղաքապետարանը պարզաբանում է տվել
Հուլիսի 27-ի երեկոյան Գյումրիի կենտրոնական հրապարակում նորաբաց շատրվանների ցուցադրության ընթացքում հնչել է ռուսական «Доля воровская» երգը։ Տեսանյութը արագ տարածվել է համացանցում՝ առաջացնելով ակտիվ քննարկումներ։
Միջադեպին հաջորդած արձագանքների թվում են ՀՀ կառավարության մի շարք պաշտոնյաների մեկնաբանությունները։ Վարչապետ Նիկոլ Փաշինյանը Telegram ալիքում գրել է.
«Вор должен сидеть в тюрьме, а не фонтанами баловаться» («Գողը պիտի նստի բանտում, ոչ թե շատրվաններով զբաղվի»)։
Տարածքային կառավարման և ենթակառուցվածքների նախարար Դավիթ Խուդաթյանը միջադեպը որակել է որպես անընդունելի՝ շեշտելով, որ քաղաքային իշխանությունները պետք է առավել պատասխանատու վերաբերմունք դրսևորեն։
Ի պատասխան միջադեպին՝ Գյումրու համայնքապետարանը հրապարակել է պարզաբանում՝ նշելով, որ տեղի ունեցածը եղել է տեխնիկական խոտանի արդյունք։
Մասնագետին չի հաջողվել վերահսկել հնչող երաժշտությունը՝ համակարգում առաջացած տեխնիկական խնդիրների պատճառով։ Խնդիրը շտկվել է, իսկ շահագործումը վերահսկող աշխատակցից պահանջվել է բացատրագիր։ Անհրաժեշտության դեպքում կկիրառվեն կարգապահական միջոցներ, – նշված է քաղաքապետարանի հայտարարությունում։
Քաղաքապետարանը նաև ներողություն է խնդրել գյումրեցիներից՝ պատճառված անհարմարության համար և վստահեցրել, որ վերահսկողությունն ուժեղացվելու է, որպեսզի նմանատիպ միջադեպեր ապագայում բացառվեն։