Շիրակի մարզում դպրոցի տնօրենը մեղադրվում է գումարներ հափշտակելու մեջ
Շիրակի մարզի «Լեռնուտի միջնակարգ դպրոց»-ի նախկին տնօրենը մեղադրվում է դպրոցից ավելի քան 485 հազար դրամ հափշտակելու մեջ։
Հակակոռուպցիոն կոմիտեն տեղեկացնում է, որ նա 2023 թվականին աշխատանքի է գրանցել մարդկանց, որոնք փաստացի չեն աշխատել։ Մասնավորապես, դպրոցի տնօրենը գրանցել է ջեռուցման բանվորի հաստիքով աշխատողի, որը ոչ մի պարտականություն չի կատարել, բայց ստացել է աշխատավարձ։ Բացի այդ, տնտեսվարի պաշտոնում նշանակված մյուս աշխատողը փաստացի սկսել է աշխատել միայն 2024 թվականի հունվարից, սակայն տնօրենը հրահանգել է վճարել նրա աշխատավարձը նաև նախորդ չորս ամիսների համար։
Այս գործողությունների հետևանքով դպրոցի տնօրենը, ըստ քննության, հափշտակել է ընդհանուր առմամբ 485 հազար դրամ։
Նրան մեղադրանք է առաջադրվել պաշտոնեական դիրքի չարաշահման համար։ Գործը ուղարկվել է Հակակոռուպցիոն դատարան։