Վայքում գտնվող «ՖԼԵՇ»-ի լցակայանը տուգանվել է թերլիցքավորման համար
Վայոց ձորի Վայք քաղաքում գործող «ՖԼԵՇ» ՍՊԸ-ին պատկանող լցակայանում Շուկայի վերահսկողության տեսչական մարմինը հերթական ստուգումն է անցկացրել։ Արդյունքում պարզվել է՝ վարորդներին լցվող վառելիքի իրական քանակը պակաս է եղել նշվածից։
Թերլիցքավորման համար ընկերությունը տուգանվել է ավելի քան 763 հազար դրամով։ Բացի այդ, տեսչական մարմնի ղեկավար Արմեն Կոտոլյանի հրամանով լցակայանը մեկ ամիս շարունակ պարտավոր է վառելիք լցնելու վայրում փակցնել հատուկ պաստառ՝ «Մենք տուգանվել ենք թերլիցքավորման համար» գրությամբ։
Սա նշանակում է, որ յուրաքանչյուր հաճախորդ, ով մոտենա տվյալ լցակայանին, անմիջապես կիմանա՝ ընկերությունը պատժվել է վարորդներին քիչ վառելիք լցնելու համար։ Այս քայլով տեսչական մարմինը փորձում է ոչ միայն պատժել, այլ նաև բացահայտ ցույց տալ խախտումը, որպեսզի վարորդները տեղեկացված լինեն և խուսափեն հնարավոր վնասներից։
Հիշեցնենք, որ նախորդ տարվա դեկտեմբերին «ՖԼԵՇ» ՍՊԸ-ն տուգանվել էր շուրջ 324 միլիոն դրամով։