Կաշառքի գործով Տեսչական մարմնի պաշտոնյաներն ու ընկերությունների աշխատակիցները դատարանում են
Հայաստանում բացահայտվել են կաշառք ստանալու դեպքեր՝ Տեսչական մարմնի պաշտոնատար անձանց և առևտրային կազմակերպությունների աշխատակիցների մասնակցությամբ։
ՀՀ հակակոռուպցիոն կոմիտեի տեղեկացմամբ՝ Քաղաքաշինության, տեխնիկական և հրդեհային անվտանգության տեսչական մարմնի պաշտոնյաներից մեկը 2024 թվականի հունիսին Երևանում գազամատակարարման աշխատանքների ընթացքում թերի աշխատանքները և ժամկետանց փաստաթղթերը անտեսելու, ինչպես նաև շահագործման թույլտվություններ տալու համար ստացել է 245 հազար դրամ կաշառք։ Մեկ այլ պաշտոնյայի հետ պայմանավորվածություն է ձեռք բերվել ևս 200 հազար դրամի մասին։
Նախաքննությամբ բացահայտվել է նաև, որ նույն ընկերության տնօրենից առևտրային կազմակերպությունների աշխատակիցները ստացել են ընդհանուր 300 հազար դրամ կաշառք: Նրանք կեղծել են փաստաթղթեր և ներառել իրականությանը չհամապատասխանող տվյալներ՝ գազաբաշխիչ կայանի շինարարության վերաբերյալ։
Գործի շրջանակում մեղադրանքներ են առաջադրվել երկու պաշտոնյայի և մի քանի աշխատակցի։ Նրանց նկատմամբ կիրառվել են տնային կալանք, վարչական հսկողություն, գրավ և պաշտոնավարման կասեցում։
Նախաքննությունն ավարտվել է, և քրեական վարույթը մեղադրական եզրակացությամբ ուղարկվել է ՀՀ հակակոռուպցիոն դատարան։