ՀՀ կառավարությունը նախատեսում է ֆիլմարտադրության ոլորտում մինչև 35% ներդրումների վերադարձ
Ապրիլի 10-ին կառավարության նիստում քննարկվել է «Կինեմատոգրաֆիայի մասին» օրենքում փոփոխություններ կատարելու նախագիծը, ըստ որի՝ օտարերկրյա ֆիլմարտադրողները Հայաստանում ֆիլմեր նկարահանելու դեպքում որոշակի աջակցություն կստանան կառավարությունից։
Նախագծով հնարավորություն է ստեղծվում կինոարտադրության ոլորտում օտարերկյա ներդրումների համար բարենպաստ պայմաններ ստեղծել, խթանել համատեղ արտադրությունը, նպաստել հավելյալ եկամուտների գեներացմանը, ֆիլմարտադրության զարգացմանը։
Կինոարտադրողները կարող են ստանալ մինչև 25% հետվերադարձ՝ կարգով սահմանված ապրանքների և ծառայությունների ցանկից: Հավելյալ 10% փոխհատուցում է նախատեսվում այն դեպքերի համար, երբ ֆիլմի հանրահռչակումը խթանում է Հայաստանում զբոսաշրջության զարգացումը:
ՀՀ կրթության, գիտության, մշակույթի և սպորտի նախարար Ժաննա Անդրեասյանը նշում է, որ կինոլորտում իրականացվում են համատեղ արտադրությամբ կինոնախագծեր, սակայն ոլորտում առկա է պետական աջակցության և մասնավոր ներդրումային միջոցների սղություն, միաժամանակ օտրարերկյա ներդրողների հոսքը հայաստան ևս սակավաթիվ է նպաստավոր պայմանների բացակայության պատճառով։
Ֆիլմարտադրության կազմակերպման համար Հայաստանի բնակլիմայական բարենպաստ պայմաններն ու մատչելի աշխատաշուկան կարող են ապահովել ոլորտի ներդրումային գրավչությունը: Հայաստանում հնարավոր է միաժամանակ նկարահանել տարվա բոլոր եղանակներին և ապահովել ֆիլմարտադրության համար անհրաժեշտ ստեղծագործական, տեխնիկական և սպասարկման աշխատանքներն ու ծառայությունները: Միջազգային փորձը փաստում է, որ ֆիլմարտադրությունը խթանելու կարևոր գործիք է ներդրումների մասնակի վերադարձի հնարավորությունը, որն ընդունված ձևաչափ է բազմաթիվ երկրներում: Կինոարտադրության ոլորտի զարգացումն ու միջազգայնացումը նպաստում են նաև տնտեսական աճին,- ասել է նախարարը՝ հավելելով, որ նման մեխանիզմ գործում է հարևան Վրաստանում, ինչպես նաև Չեխիայում, Մալթայում, Խորվաթիայում և այլ երկրներում:
Նախարարը նաև հավելել է, որ ֆիլմարտադրության ներդրումների վերադարձի նպատակով 2025 թվականի բյուջեում արդեն իսկ միջոցներ նախատեսվել են, հետևաբար, եթե ներկայացվեն համապատասխան ծրագրեր, ապա դրանք կարող են ստանալ փոխհատուցում:
Նախագիծը ներկայացրել է ՀՀ կրթության, գիտության, մշակույթի և սպորտի նախարար Ժաննա Անդրեասյանը։