Առաջարկվում է հեշտացնել մուտքը «Արտաշատ մայրաքաղաք» արգելոց
Ազգային անվտանգության ծառայությունը առաջարկում է «Արտաշատ մայրաքաղաք» պատմամշակութային արգելոց մուտքը հեշտ դարձնել։ Ներկայումս արգելոց գնալու համար պետք է հատուկ թույլտվություն (անցագիր) և փաստաթուղթ։ Այս նախագծով այլևս անհրաժեշտ չի լինի ո՛չ թույլտվություն, ո՛չ էլ անձնագիր։
Արգելոցը գտնվում է Հայաստան-Թուրքիա սահմանի մոտ։ Այդ պատճառով մուտքը բարդ է եղել։ Շատ աշակերտներ, ուսանողներ ու զբոսաշրջիկներ չեն կարողանում այցելել։ Նախագծի հեղինակները նշում են, որ այս փոփոխությունը կօգնի ավելի շատ մարդկանց տեսնել արգելոցը՝ առանց ավելորդ թղթաբանության։
«Արտաշատ մայրաքաղաք» արգելոցը գտնվում է Արարատի մարզում։ Այն եղել է հին Հայաստանի մայրաքաղաքներից մեկը։ Շատ պատմագիրներ այն նկարագրում են որպես մեծ ու գեղեցիկ քաղաք։ Այստեղ եղել են արհեստագործություն, առևտուր ու մշակույթ։
Հիշեցնենք, որ Հայաստանի կառավարությունը նախատեսում է փոխել «Արտաշատ մայրաքաղաք» պատմամշակութային արգելոցի տարածքը։ Կառավարության հիմնավորման մեջ նշված է, որ «Արտաշատ մայրաքաղաք» պատմամշակութային արգելոցի սահմաններում ընդգրկվել են մայրաքաղաքի տարածքում գտնվող միայն 11-րդ և 12-րդ բլուրները: Արգելոցի սահմաններից դուրս են մնացել հուշարձանի մասը կազմող 1-9-րդ բլուրների վրա կառուցված պալատական համալիրը, զորանոցային մասը և զինագործակական արհեստագործական թաղամասը, պաշտպանական համալիրի և քաղաքացիական նշանակության կառուցապատված թաղամասերը:
Կառավարության նախաձեռնության համաձայն՝ արգելոցի շուրջ 6 հեկտար մակերեսով հողատարածքին կավելանա ևս 78 հեկտար։ Ընդհանուր առմամբ՝ «Արտաշատ մայրաքաղաք» պատմամշակութային արգելոցի տարածքը կլինի շուրջ 84 հեկտար։