Արմավիրում կայացավ «Ֆեստիվառի» եզրափակիչ համերգը
Սեպտեմբերի 21-ին Արմավիրի կենտրոնական հրապարակում անցկացվեց «Ֆեստիվառ» զբոսաշրջային-երաժշտական փառատոնի երրորդ և եզրափակիչ համերգը, նվիրված Հայաստանի անկախության 34-րդ տարեդարձին։
Բեմում հանդես եկան Հայաստանի պետական սիմֆոնիկ նվագախումբը, ինչպես նաև հայկական էստրադայի հայտնի կատարողներ՝ Մաշա Մնջոյան, Ժակոն, Իվետա Մուկուչյան, Էրիկ Կարապետյան, Բրյունետը, «Գարիկ և Սոնա» խումբը, «Նեմրա» և «Ռեինկարնացիա» օրկեստրան։
Մինչ համերգը, Արմավիրում կազմակերպվել էր տեղական արտադրանքի տոնավաճառ, իսկ հյուրերը հնարավորություն էին ստացել այցելելու մարզի տեսարժան վայրեր։
«Ֆեստիվառը» անցկացվում է արդեն երրորդ տարին անընդմեջ։ Այս անգամ այն մեկնարկել էր օգոստոսի 23-ին Արտաշատում Սարո Թովմասյանի համերգով, իսկ սեպտեմբերի 13-ին Հրազդանում տեղի էր ունեցել Հարութ Փամբուկչյանի՝ Ձախ Հարութի մենահամերգը Karen Sevak Band-ի նվագակցությամբ։