Կթողարկվի Տիգրան Մանսուրյանի կինոերաժշտությունների ալբոմը

Դեկտեմբերի 20-ին թողարկվելու է հայ մեծանուն կոմպոզիտոր Տիգրան Մանսուրյանի կինոերաժշտությունների ալբոմը։ Այս մասին հայտարարություն է տարածել Երևանի քաղաքապետարանը։ Ստեղծագործությունները կատարելու է Հայաստանի պետական սիմֆոնիկ նվագախումբը՝ դիրիժոր Սերգեյ Սմբատյանի ղեկավարությամբ։

Ալբոմը ներառում է Մանսուրյանի սիրված ստեղծագործությունները հայկական կինոյից։ Դրանք հասանելի են լինելու աշխարհի մի շարք առաջատար երաժշտական հարթակներում՝ Spotify, Apple Music, Amazon Music, YouTube և այլն։

Տիգրան Մանսուրյանը երաժշտություններ է գրել այնպիսի ֆիլմերի համար, ինչպիսիք են «Մենք ենք, մեր սարերը», «Աշնան արևը», «Գործուղում առողջարանը», «Տերը», «Մեր մանկության տանգոն», «Մի կաթիլ մեղրը», «Հին օրերի երգը», «Գիքորը» և այլն։ Իր հարցազրույցներից մեկում կոմպոզիտորը հիշել է, որ կոնսերվատորիայի 4-րդ կուրսում է առաջարկություն ստացել ֆիլմի համար երաժշտություն գրել։

Ես մեծ պատասխանատվությամբ եմ տրվել կինոերաժշտություն գրելու աշխատանքին։ Ամենամեծ դժվարությունն ինձ համար իմ երաժշտությունից դեպի կինոերաժշտություն անցում կատարելն էր, քանի որ հոգեբանությունը, հնչողական ընկալումները, արժեքներն ամբողջությամբ պետք է տեղափոխես կինոյի բնագավառ, — նշել է Մանսուրյանը։

Ծրագիրը իրականացվելու է Մանսուրյանի ծննդյան 85-ամյակին նվիրված միջոցառումների շրջանակներում։