Օդային ճանապարհով մի քանի ժամում, ցամաքային ճանապարհով 5 օրում հայկական ձկնամթերքը կհասնի Եվրամիություն

Շուրջ 8 տարի տևած բանակցություններից հետո Հայաստանը 2025 թվականի մարտի 16-ին հնարավորություն կստանա թեփուկավոր ձկները և դրանց արտադրանքը (խավիար և ձկնկիթ) արտահանել Եվրամիության անդամ երկրներ։ Այս հնարավորությունը սահմանվել է նոր ընդունված Եվրոպական հանձնաժողովի իրականացման կանոնակարգի համաձայն։ Բոլոր տեխնիկական հարցերը կարգավորելուց հետո հայկական ձկնամթերքը, օդային ճանապարհով մի քանի ժամվա, իսկ ցամաքային ճանապարհով առավելագույնը 4-5 օրվա ընթացքում կհասնի Եվրոպա։  

Իսկ տեխնիկական խնդիրները լուծելու համար տնտեսվարողները պետք է գրանցված լինեն ԵՄ «TRACES» համակարգում։

Սա շատ կարևոր ու բացառիկ նշանակության հնարավորություն է մեր երկրի, տնտեսվարողների համար։ Առաջին անգամ է, որ Հայաստանը հնարավորություն է ստանում ԵՄ արտահանել ձուկ ու ձկնամթերք։ Մենք մեր հարևան երկրներից ենք նույնիսկ առաջ անցել։ Ունենք հարևաններ, որ ձկնաբուծության ոլորտից ԵՄ շուկա մեկ տեսակի ապրանքի արտահանման թույլտվություն են ստացել, օրինակ՝ խավիար, իսկ մենք ստացել ենք թույլտվություն ձկնարտադրության ոլորտի բոլոր տեսակի ապրանքերի համար, — նշել է Սննդամթերքի անվտանգության տեսչական մարմնի ղեկավարի տեղակալ Տիգրան Պետրոսյանը։ 

Նախորդ տարի Հայաստանում արտադրվել է 27 հազար տոննա արդյունաբերական արտադրության ձուկ, ձկնամթերք, ինչը 5 տոկոսով ավելի է 2023 թվականի համեմատ։ Հանրապետությունում բուծվում են թառափազգի, իշխանազգի և կարպազգի ձկնատեսակներ։ «Հայաստանի ձկնաբույծների միություն» հասարական կազմակերպության տնօրեն Գոռ Գրիգորյանը հայտարարել է, որ նախորդ տարվա արտադրանքից 15 հազար տոննան արտահանվել է հիմնականում Ռուսաստան, Ամերիկայի Միացյալ Նահանգներ և Արաբական Միացյալ Էմիրություններ: