Եվրոպական ներդրումային բանկը վարկային համաձայնագիր է ստորագրել Հայաստանի հետ
Սիսիան-Քաջարան ճանապարհահատվածի շինարարությունը համաֆինանսավորելու համար Եվրոպական ներդրումային բանկի համաշխարհային ստորաբաժանումը (ԵՆԲ Գլոբալ) 236 միլիոն եվրոյի համաձայնագիր է ստորագրել Հայաստանի հետ։
Ճանապարհահատվածը «Հյուսիս-Հարավ» ճանապարհային միջանցքի կարևոր հատվածներից է, որը պետք է կապի Եվրոպական միությանը, Մերձավոր Արևելքին և Ասիային։
Ծրագրի շնորհիվ կկրճատվի ճանապարհորդությունների հեռավորությունը՝ ըստ այդմ էլ կկրճատվեն տրանսպորտային միջոցների շահագործման ծախսերն ու ճանապարհային պատահարները։
Սիսիան-Քաջարան ճանապարհահատվածի կառուցումը լուրջ խթան կդառնա Հայաստանի տնտեսական աճի համար, կամրապնդի ինչպես տարածաշրջանային, այնպես էլ միջազգային միակցվածությունը, կբարելավի տրանսպորտային անվտանգությունն ու արդյունավետությունը եւ վճռորոշ դեր կխաղա երկրի ենթակառուցվածքների զարգացման ավելի լայն նպատակների առումով, — նշել է ֆինանսների նախարար Վահե Հովհաննիսյանը։
Եվրոպական ներդրումային բանկը (ԵՆԲ) Եվրոպական միության երկարաժամկետ ֆինանսավորման հաստատություն է, որը պատկանում է անդամ պետություններին։ Այն տրամադրում է երկարաժամկետ ֆինանսավորում հուսալի ներդրումների համար՝ աջակցելով ԵՄ քաղաքականության նպատակներին չորս առաջնահերթ ոլորտներում՝ ենթակառուցվածքներ, նորարարություն, կլիմա և շրջակա միջավայր, փոքր և միջին ձեռնարկություններ։