Հայաստանյան բանկերը շահույթի մեծ մասը վերաներդրել են բիզնեսում

Հայաստանյան բանկերը 2025 թվականին իրենց մաքուր շահույթի ավելի քան 90%-ը վերաներդրել են բիզնեսում։ Այս մասին մամուլի ասուլիսի ժամանակ հայտարարեց Հայաստանի բանկերի միության նախագահ Դանիել Ազատյանը։

Ըստ նրա՝ 2025 թվականին հայաստանյան բոլոր բանկերի միասնական մաքուր շահույթը կազմել է 421 մլրդ դրամ, ինչը մոտ 160 մլն դոլարով շատ է 2024 թվականի ցուցանիշից։ Միջին հաշվով, այդ գումարի մոտ 5 %-ը՝ 20 մլրդ դրամ, բաժնետերերին է բաժնետարածվել, իսկ մնացած գումարը բանկերը վերաներդրել են իրենց կապիտալում։ Արդյունքում՝ 2025 թվականին բանկային կապիտալը աճել է գրեթե 400 մլրդ դրամով՝ հասնելով 2 տրլն 175 մլրդ դրամի։

Ազատյանը հավելեց, որ բանկերի կապիտալը շատ ավելի բարձր է, քան նվազագույն պահանջվող ցուցանիշը, ինչը ապահովում է ֆինանսական կայունություն։ 2025 թվականի վերջի տվյալներով՝ կապիտալի և ռիսկային ակտիվների հարաբերակցությունը կազմել է 20.68%, երբ նվազագույն ցուցանիշը 11%-ն է։

Նա նաև նշեց, որ որոշ վարկառուներ հաճախ չեն մարում իրենց վարկերը, ինչը ռիսկ է ստեղծում բանկերի համար։ Այդ պատճառով 2024 թվականին Կենտրոնական բանկը բարձրացրել է «հակացիկլիկ կապիտալի բուֆերը»՝ վարկավորման ժամանակ ավելորդ ռիսկերը նվազեցնելու համար։ Սա հատկապես վերաբերում է հիփոթեքային և սպառողական վարկերին։