Այսօր Հայաստանի բանակը 33 տարեկան է
Այսօր Հայաստանի Հանրապետությունում նշվում է բանակի 33-րդ տարեդարձը։ Բանակի ծնունդը մեծ նշանակություն ունեցավ անկախ պետականության կայացման գործում։ Այս ճանապարհը լի էր հաղթանակներով, դժվարություններով և փորձություններով։
Բանակը մեր անկախ պետականության հիմնասյունն է, այն կառույցը, որն ապահովում է մեր խաղաղությունն ու անվտանգությունը։ Իր ստեղծման առաջին իսկ օրվանից բանակը դարձավ ժողովրդի ինքնապաշտպանության մարմնացում՝ ձևավորվելով Արցախյան պատերազմի ծանր տարիներին։ Այդ տարիներից ի վեր մեր զինվորներն ու սպաները՝ հին ու նոր սերունդները, իրենց արյամբ և քրտինքով պաշտպանել են այն արժեքները, որոնց վրա հիմնվում է մեր պետականությունը։
Բանակի հզորացումը կախված է նաև մեզնից՝ հասարակությունից։ Ամուր բանակ ունենալու համար մեզ պետք է միասնականություն, վստահություն և մշտական աջակցություն։ Այսօր գլուխ ենք խոնարհում այն հերոսների առաջ, ովքեր կյանքը նվիրաբերեցին մեր երկրի անկախության և խաղաղության համար։ Բանակի 33 ամյակը առիթ է վերարժևորելու մեր ապագայի ուղին։ Պատասխանատվությունն այս հզոր կառույցի առաջ պետք է լինի մեր բոլորիս պարտավորությունը՝ հանուն ուժեղ, ապահով և խաղաղ Հայաստանի։
Շնորհավոր բանակի տոնը։