Սկսվել է ուսուցիչների կամավոր ատեստավորման հայտերի ընդունման գործընթացը
Հուլիսի 2-ից մեկնարկել է հանրակրթական ուսուցիչների կամավոր ատեստավորման հայտագրումը։ Կրթության, գիտության, մշակույթի և սպորտի նախարարությունը տեղեկացնում է, որ հայտադիմումները կընդունվեն մինչև սեպտեմբերի 30-ը՝ ժամը 18։00-ն։
Ատեստավորմանը կարող են մասնակցել հանրակրթական ուսումնական հաստատություններում աշխատող բոլոր ուսուցիչները՝ անկախ դասավանդվող առարկաների քանակից։ Դիմումը հնարավոր է ներկայացնել միայն մեկ առարկայից՝ ըստ ուսուցչի ընտրության։
Բացի գործող ուսուցիչներից, մասնակցելու հնարավորություն ունեն նաև երեք տարեկանից փոքր երեխայի խնամքի արձակուրդում գտնվող մասնագետները, ինչպես նաև «Հանրակրթության մասին» օրենքի պահանջներին համապատասխանող, բայց տվյալ պահին դպրոցում չաշխատող անձինք։ Ատեստավորման ծրագրին կարող են մասնակցել նաև հանրակրթական առարկաներ դասավանդող մասնագետներ, որոնք աշխատում են նախնական և միջին մասնագիտական կրթական հաստատություններում։ Բարձրագույն կրթություն չունեցող, սակայն նախկինում ուսուցչի պաշտոնում զբաղված և այժմ դադարեցված գործունեություն ունեցող անձանց համար ևս ծրագիրը հասանելի է՝ համապատասխան կառավարության որոշման շրջանակում։
Դիմումների ներկայացման համար գործարկված են երկու առցանց հարթակներ։
Գործող ուսուցիչները պետք է մուտք գործեն matyan.emis.am, իսկ ուսուցիչ չաշխատող մասնագետները՝ at.emis.am։ Երկու դեպքում էլ հայտը համարվում է ընդունված միայն հարթակից հաստատման հաղորդագրություն ստանալուց հետո։
Կամավոր ատեստավորումն անցկացվում է էլեկտրոնային թեստավորման եղանակով՝ vexams.emis.am կայքի միջոցով։ Թեստերը կազմված են ըստ առարկաների՝ մի շարք դեպքերում միավորված ձևաչափով։ Օրինակ՝ «Հայոց լեզու», «Մայրենի», «Գրականություն» առարկաները ներկայացված են որպես մեկ միասնական թեստ՝ «Հայոց լեզու» անվան տակ։ Նմանատիպ միավորումներ կիրառվում են նաև «Պատմություն», «Աշխարհագրություն», «Ինֆորմատիկա», «Մաթեմատիկա» և այլ առարկաների պարագայում։ Դասվարների համար նախատեսված է մեկ միասնական թեստ, որը ներառում է «Մայրենի», «Մաթեմատիկա» և «Ես և շրջակա աշխարհը» առարկաները։