Հայտնի են 2025 թվականի բուհական ընդունելության արդյունքները
2025 թվականի օգոստոսի 1-ին Գնահատման և թեստավորման կենտրոնի փոխտնօրեն Կարո Նասիբյանը հանդես եկավ բուհական ընդունելության այս տարվա ամփոփմամբ՝ ներկայացնելով ինչպես քանակական ցուցանիշները, այնպես էլ մրցութային գործընթացի փուլային արդյունքները։
Ըստ ներկայացված տվյալների՝ այս տարի միասնական քննություններին մասնակցել է ավելի քան 41,500 դիմորդ։ Ընդունելության գործընթացը կազմակերպվել է երկու փուլով՝ հիմնական և լրացուցիչ։ Քննությունները մեկնարկել էին դեռևս հունվարի 15-ին և ավարտվել էին հուլիսի 10-ին։ Նախապես հաստատվել էր 2142 անվճար և 9984 վճարովի ուսանողական տեղ՝ պետական և ոչ պետական բուհերի համար։
Հիմնական փուլում, ըստ ԳԹԿ-ի, ընդունվել է 7719 դիմորդ, իսկ ներբուհական քննությունների արդյունքում՝ 2069։ Ընդհանուր առմամբ, այս փուլից հետո ընդունվել էր 9788 ուսանող։ Սակայն ընդունելությունից հետո թափուր էր մնացել 2355 տեղ, այդ թվում՝ 264 անվճար և 2091 վճարովի։
Լրացուցիչ փուլում հայտագրվել էր 1478 դիմորդ, որոնցից ընդունվել է 1182-ը։ Նրանց թվում կային նաև ներբուհական քննություններին մասնակցած 24 դիմորդ։ Անվճար հիմունքներով ընդունվել է 47 դիմորդ, իսկ վճարովի՝ 1135։ Երկու փուլերից հետո թափուր է մնացել 1174 տեղ՝ 219 անվճար և 955 վճարովի։ Դրական գնահատական ստացած, բայց չընդունված դիմորդների թիվը կազմել է 296։
Մրցութային գործընթացի մի շարք ցուցանիշներ վկայում են ընդունելության համակարգի որոշակի խնդիրների մասին։ Մասնավորապես, երկու դրական գնահատական ունեցող, սակայն չընդունված դիմորդների թիվը հասել է 1999-ի։ Բացի այդ, 1227 դիմորդ ստացել է անբավարար գնահատական երկու քննությունից, իսկ 1797-ը՝ մեկ քննությունից։
Ներբուհական քննություններին մասնակցել է 2069 դիմորդ, որոնցից 753-ը չեն կարողացել անցնել շեմը և դուրս են մնացել մրցույթից։