Տարակարգի համար ներկայացվող փաստաթղթերի ցանկը կպարզեցվի

Կառավարությունն ընդունել է որոշում, որով պարզեցվում է ուսուցիչների տարակարգի ստացման գործընթացը։ Փոփոխությունների շրջանակում կրճատվել է պահանջվող փաստաթղթերի ցանկը, և ամբողջ գործընթացն առաջիկայում կիրականացվի բացառապես էլեկտրոնային եղանակով։

Ըստ որոշման՝ հունիս-սեպտեմբեր ամիսներին տարակարգի համար դիմող ուսուցիչները պետք է ներկայացնեն մայիս ամսվա ընթացքում կազմված դասի պլանները։ Առաջարկվում է առաջին աստիճանի տարակարգ շնորհել 80-89% մասնագիտական արդյունք ապահովելու դեպքում, իսկ երկրորդ աստիճանի՝ 90-100% արդյունքի դեպքում։

Առաջիկայում տարակարգի փաստաթղթերը կընդունենք միայն էլեկտրոնային եղանակով, որը թե՛ ռեսուրսի խնայողության տեսանկյունից է կարևոր, թե՛ հաշվի առնելով, որ կրթության կառավարման տեղեկատվական հարթակում արդեն իսկ բավարար տվյալներ կան, հնարավորություն կտա կրճատել այն փաստաթղթերի ծավալը, որը պետք է ներկայացվի, և կրկնակի գործ չանել ուսուցիչների համար, ինչպես օրինակ՝ էլեկտրոնային մատյանում լրացված դասի պլաններն արդեն իսկ բավարար կլինեն. դրանք առանձին լրացնելու կարիք չկա: Այս փոփոխությամբ մենք նաև հնարավորություն ենք տալու, որպեսզի, ուսուցչի ներկայացրած փաստաթղթերի համապատասխանությունը դիտարկելով՝ հանձնաժողովն իրավասու լինի համապատասխան տարակարգ շնորհելու: Հիմա ուսուցիչը կարող է դիմել 3-րդ աստիճանի տարակարգի, հանձնաժողովն ուսումնասիրի և տեսնի, որ նրա փաստաթղթերը համապատասխանում են, դիցուք, 4-րդ կամ 2-րդ աստիճանի տարակարգին, բայց նման որոշում կայացնելու իրավունք չունի, որովհետև կարող է արձագանքել միայն ուսուցչի առաջարկած տարակարգին, և սա նույնպես կրկնակի վարչարարություն է առաջացնում, որովհետև ստիպված է լինում մերժել, և ուսուցիչը ստիպված է լինում դիմել այլ տարակարգի համար:

Բացի այդ, սահմանվել է հստակ ժամկետ հանրապետական հանձնաժողովի որոշման բողոքարկման համար՝ որոշման մասին տեղեկացվելուց հետո 5 աշխատանքային օր։

Հետազոտությունները ցույց են տալիս, որ Հայաստանում ամենաբարձր կրթական արդյունքները գրանցում են 10-20 տարվա աշխատանքային փորձ ունեցող ուսուցիչները։ Միաժամանակ, մինչև 5 տարվա փորձ ունեցող ուսուցիչների արդյունքները զգալիորեն ցածր են, ինչը վկայում է սկսնակ ուսուցիչների մասնագիտական զարգացման անհրաժեշտության մասին։ Հատկանշական է նաև, որ ուսուցիչների 46%-ը 50 տարեկանից բարձր է, ինչը նշանակում է, որ առաջիկա տասնամյակում անհրաժեշտ կլինի ուսուցչական կազմի լուրջ վերափոխում։