Երևանի գլխավոր տոնածառը կթարմացվի․ հայտնի է, թե ինչքան գումար կծախսվի դրա համար

2025 թվականին ամբողջությամբ կփոխարինվեն Հանրապետության հրապարակում տեղադրվող՝ Երևանի գլխավոր տոնածառի ճյուղերն ու լուսավորությունը։ Աշխատանքների համար քաղաքային իշխանությունները կծախսեն մոտ 50 միլիոն դրամ (շուրջ 130 հազար դոլար)։

Տոնածառի տեղադրման նախապատրաստական աշխատանքները մեկնարկել են հոկտեմբերի 30-ին՝ սովորականից ավելի շուտ։ 2024 թվականին դրանք սկսվել էին նոյեմբերի 5-ին, իսկ 2023-ին՝ նոյեմբերի 13-ին։ Քաղաքապետարանից հայտնում են, որ աշխատանքները շուտ են սկսվել, որպեսզի հասցնեն ավարտել կառուցվածքի մոնտաժն ու թարմացումը մինչև դեկտեմբերի կեսը։ Մետաղական կոնը հավաքելուց հետո կսկսվի ճյուղերի, խաղալիքների և ծաղկեշղթաների տեղադրումը։

Աշխատանքներն իրականացնում է քաղաքապետարանին ենթակա կոմունալ ընկերությունը։ Երթևեկությանը չխանգարելու համար հիմնական աշխատանքները կատարվում են գիշերը՝ ժամը 23:00-ից հետո։

Ներկայիս տոնածառը բերվել է Ռուսաստանից 2018 թվականին։ Նոր ճյուղերի ձեռքբերման աղբյուրը դեռ հստակ չէ, սակայն հները կօգտագործվեն վարչական շրջանների տոնածառերը զարդարելու համար։