Կասեցվել է Երևանի կաթնամթերքի արտադրամասի գործունեությունը սանիտարական խախտումների պատճառով
Երևանում կասեցվել է կաթնամթերքի արտադրամասի գործունեությունը, քանի որ այն գործել է մի շարք սանիտարահիգիենիկ խախտումներով։ Արտադրամասը պատկանում է անհատ ձեռնարկատեր Գուրգեն Ղազարյանին և գտնվում է Գրիգոր Զոհրապ փողոցում։
Սննդամթերքի անվտանգության տեսչական մարմինը իրականացրել է վերահսկողական միջոցառումներ, որոնց ընթացքում արձանագրվել են բազմաթիվ խախտումներ, որոնք սպառնալիք են ներկայացնում սննդամթերքի անվտանգության համար։
Մասնավորապես, պարզվել է, որ արտադրամասի կառուցվածքը և ներքին դասավորությունը կազմակերպված չեն եղել այնպես, որ մաքուր և կեղտոտ գույքը իրարից բաժանված լինեն։ Շինությունը չի ունեցել օդափոխության միջոցներ, ինչը խոչընդոտել է սանիտարական պահանջների պահպանմանը։ Առաստաղների մակերեսները չեն եղել անջրանցիկ և լվացվող, իսկ դռները պատրաստված չեն եղել հարթ և չներծծող նյութերից։ Ավելին, կոյուղու համակարգը նախագծված չի եղել այնպես, որ բացառի սննդամթերքի աղտոտման վտանգը, իսկ արտադրամասում առկա սարքավորումները և գործիքները չեն պահպանվել բարվոք տեխնիկական վիճակում։
Հաշվի առնելով վերոնշյալ խախտումները՝ տեսչական մարմնի ղեկավարի որոշմամբ արտադրամասի արտադրական գործունեությունը ժամանակավորապես կասեցվել է։ Սահմանվել է ժամկետ խախտումներն ու անհամապատասխանությունները վերացնելու համար։