Հանրային սննդի օբյեկտում խախտումներ են հայտնաբերվել
Սննդամթերքի անվտանգության տեսչական մարմինը կասեցրել է Արարատի մարզի Վերին Արտաշատ համայնքում գործող հանրային սննդի օբյեկտի աշխատանքը։ Ստուգումների արդյունքում պարզվել է, որ այն գործել է լուրջ սանիտարահիգիենիկ խախտումներով։
Մասնավորապես, օբյեկտի խոհանոցի հատակը, պատերն ու առաստաղը չեն ունեցել հարթ մակերես և նորոգ վիճակ, ինչի հետևանքով հնարավոր չի եղել ապահովել պատշաճ մաքրում և ախտահանում։ Բացի այդ, լվացարանի և սեղանների մակերևույթները պատրաստված չեն եղել հիգիենայի պահանջներին համապատասխանող նյութերից և չեն գտնվել բարվոք վիճակում։
Նշվում է նաև, որ շինության կառուցվածքը նպաստել է անցանկալի բորբոսի առաջացմանը։
Հաշվի առնելով խախտումները՝ տեսչական մարմինը որոշում է կայացրել կասեցնել օբյեկտի արտադրական գործունեությունը։ Սեփականատիրոջը տրվել է ժամկետ՝ բացահայտված խնդիրները վերացնելու համար։