Հայ-իրանական զինված ուժերի առաջին զորավարժություններն ավարտվեցին․ ի՞նչ է ասում հարևանը
Հայաստանի ու Իրանի միջև տևական ժամանակահատվածում առաջին անգամ զինված ուժերի հատուկ նշանակության ստորաբաժանումների համատեղ զորավարժությունները ավարտվեցին։ Զորավարժությունը ենթադրում էր Հայաստան-Իրան պետական սահմանին տեղակայված սահմանային անցակետերի վրա պայմանական ահաբեկչական խմբերի հարձակումը չեզոքացնելու գործողություններ:
Չնայած այն փաստին, որ հայկական կողմը չի նշել, թե ինչ զինատեսակներ են օգտագործվելու զորավարժությունների ընթացքում, ըստ իրանական IRNA լրատվամիջոցի՝ զորավարժությունների ծրագիրը ներառում էր թեթև և ծանր զինատեսակների կիրառում, հատուկ նշանակության ջոկատների դիպուկահարների կրակ, ինչպես նաև կրակահերթերի աջակցում ու ոչնչացման գործողություններ։
Նշենք նաև, որ Հայաստանի Զինված ուժերի ստորաբաժանումը զորավարժությունն անցկացրել է Հայաստանի տարածքում, իրանական ստորաբաժանումը՝ Իրանի տարածքում։
Իրան-Հայաստան զորավարժությունների հիմնական նպատակը սահմանների անվտանգության ուժեղացումն է և ստորաբաժանումների մարտունակության բարձրացումը, հայտարարել է ԻՀՊԿ ցամաքային զորքերի օպերատիվ վարչության պետի տեղակալ Վալիոլլահ Մանին։
Զորավարժությունների արդյունքների մասին Հայաստանի Զինված ուժերը դեռևս տեղեկատվություն չի հրապարակել։