Զինված ուժերում գնդերեցների ծառայությունը կշարունակվի նոր կարգավորմամբ․ ի՞նչ է ասել Պապիկյանը
ՀՀ պաշտպանության նախարար Սուրեն Պապիկյանը պարզաբանել է, որ բանակում գնդերեցները կարող են շարունակել իրենց հոգևոր ծառայությունը, եթե ենթարկվեն զինված ուժերի բարոյահոգեբանական գծով վարչությանը։ Այս մասին նա նշել է Ազգային ժողովում լրագրողների հետ զրույցում՝ արձագանքելով մտավախություններին, որ իր որոշմամբ հոգևոր ծառայությունը լուծարվել է։ Նախարարն այն գնահատել է որպես շահարկում և ընդգծել, որ ծառայության բնույթն է փոխվել։
Պապիկյանը հայտարարել է, որ բանակում երկակի ենթակայություն չի կարող լինել՝ նկատի ունենալով այն հանգամանքը, որ մինչ այդ գնդերեցները ենթարկվում էին Մայր աթոռին։ Նախարարի խոսքով՝ նոր կարգավորումներն իրավաչափ են, և եթե Մայր աթոռը դեմ է, կարող է դատարան դիմել։
Պապիկյանը հերքել է լուրերը, թե գնդերեցներին առաջարկվել է 700 հազար դրամ՝ «եկեղեցու բարենորոգման» օրակարգին միանալու համար։
Աշխատավարձի չափ չեմ կարող ասել, բայց կարող եմ ասել, որ նախարարի հրամանը բացահայտում է՝ մենք կարող ենք պայմանագիր կնքել Հայաստանում Հայ առաքելական եկեղեցու հոգևոր կրթություն ունեցող սպասավորների հետ, որ նրանք ծառայեն և կատարեն իրենց առաքելությունը։ Աշխատավարձ չեմ կարող ասել, բայց բավարար աշխատավարձ կլինի, որը կտարբերվի նախկինում եղածից։
Հիշեցնենք՝ հունվարի 30-ին Մայր աթոռին է ուղարկվել Պապիկյանի որոշումը, ըստ որի՝ բանակի գնդերեցները պետք է ենթարկվեն հրամանատարի դաստիարակչական աշխատանքների գծով տեղակալին։ 2026 թվականի փետրվարի 1-ից դադարեցվել է հոգևոր ծառայության առաջնորդի և Մայր աթոռի կողմից նշանակված հոգևոր ծառայողների գործունեությունը ՀՀ պաշտպանության նախարարության համակարգում։
Այս որոշումից հետո 42 գնդերեցներից 3-ը անցել են պարտադիր ժամկետային զինծառայության, 4-ը միացել են եկեղեցու «բարենորոգման» շարժմանը, իսկ մնացած 35-ը վերադարձել են Մայր աթոռ և սպասում են նոր նշանակումների։
