Ռուբեն Վարդանյանի որդին հայտնում է, որ հայրը մեկուսացված է
Արցախի նախկին պետնախարար Ռուբեն Վարդանյանի որդին՝ Դավիթ Վարդանյանը, հայտարարել է, որ փաստաբանները չեն կարողանում տեսակցել նրան։
Առանցքային խնդիրն ու իրավիճակի անհեթեթությունն այն է, որ հորս շահերը ներկայացնող միակ անձինք, որոնք կարող են նրան տեսակցել, ադրբեջանցի իրավաբաններն են։ Մեր միջազգային փաստաբանները ոչ մի անգամ չեն կարողացել ոչ թե տեսակցել նրան, այլև նույնիսկ կապ հաստատել նրա հետ։ Այսինքն դա տեղեկատվության լիակատար վակուում է և ամբողջական մեկուսացում,– որդու խոսքերը հայտնում է RTVI-ը։
Վարդանյանը փաստում է, որ Ռուբեն Վարդանյանին նաև չեն կարողանում այցելել անկախ բժիշկները, իսկ իրավաբանների բոլոր հարցումները «կամ ուղղակի անտեսվել են, կամ մերժվել»։ Նա հավելել է, որ կապի միակ միջոցը նամակներն են Կարմիր խաչի միջոցով, որը շատ կոշտ սահմանափակում ունի՝ 4 էջից ոչ ավելի։
Կարմիր խաչն անում է, ինչ կարող է, բայց նրանց ձեռքերն էլ են կապված։ Սովորական նամակներ մենք չենք կարող ուղարկել։ Հայրս ասել է, որ բազում նամակներ է ուղարկել, սակայն, դրանցից ոչ մեկը չի հասել հասցեատերին՝ այսինք հաղորդակցության այդ ուղին ևս չի գործում,–ասել է նա։
Դավիթ Վարդանյանը հաստատել է, որ հորը 45 մեղադրանք է ներկայացվել՝ 20 հոդվածով։ Մեղադրանքներն առնչվում են Ադրբեջանի Քրեական օրենսգրքի 20 տարբեր հոդվածների հատկանիշներին։ Շինծու ապացույցները ներկայացված են 100 հատորով, ընդհանուր ծավալը կազմում է մոտ 25,000 էջ, ամբողջը՝ ադրբեջաներեն: