Կառավարությունը դրական դիրքորոշում է հայտնել ԵՄ-ին անդամակցելու քաղաքացիական նախաձեռնությանը
Հունվարի 9-ին կայացած Կառավարության նիստում Արտաքին գործերի նախարար Արարատ Միրզոյանը ներկայացրել է օրենքի նախագիծ, որն Ազգային ժողով է ներկայացվել քաղաքացիական նախաձեռնության կարգով։ Առաջարկվում է սկսել Հայաստանի՝ ԵՄ-ին անդամակցելու գործընթացը։ Արարատ Միրզոյանը անդրադարձել է Հայաստան-ԵՄ հարաբերություններին և նշել, որ վերջին տարիներին դինամիկ հարաբերություններ են հաստատվել կողմերի միջև տարբեր ոլորտներում։
ԵՄ-ն տարբեր առիթներով ընդգծված քաղաքական աջակցություն է հայտնել Հայաստանի ժողովրդավարությանը: ԵՄ-ն պատրաստակամություն է հայտնել և, ըստ էության, ներգրավվել է Հայաստանի շուրջ անվտանգային միջավայրի ապահովմանը՝ նկատի ունեմ քաղաքացիական դիտորդական առաքելության տեղակայումը: ԵՄ-ն նաև պատրաստակամություն է հայտնել՝ աջակցելու Հայաստանի տնտեսական դիմակայունության ամրապնդմանը: Տեղյակ ենք, որ, ակնհայտորեն, ԵՄ-ն և անդամ երկրներն ունեն շատ հարուստ ժողովրդավարական ավանդույթներ, ազատ մրցակցային միջավայր, արդիական տնտեսություն, առաջադեմ, զարգացած գիտություն և ելնելով այս հանգամանքից նաև դուք՝ պարոն վարչապետ, եվրոպական խորհրդարանում ելույթ ունենալիս հայտարարել եք, որ ՀՀ-ն պատրաստ է մոտ լինել ԵՄ-ին այնքան, որքան ԵՄ-ն դա հնարավոր կհամարի: Մենք այդ հնարավոր համարելու նշաններն էլ ենք տեսել, նկատի ունեմ և՛ վիզաների ազատականացման մեկնարկը, և՛ մի շարք այլ գործիքներ, որոնք արդեն կիրառվել են կամ քննարկվում են մեր և ԵՄ-ի միջև: Օրինակ՝ գործընկերության նոր օրակարգ։
Նա որոշ բովանդակային փոփոխություններ է առաջարկել նաև՝ համարակալել դրույթներ, ուժի մեջ մտնելու հստակ ամսաթիվ նշանակել և այլն։
Փաշինյանը քննարկման ընթացքում արձանագրել է, որ նախագծի ընդունումը չի նշանակում Եվրամիության անդամակցություն։ Դրա համար անհրաժեշտ է հանրաքվե անցկացնել։
Ստորագրահավաքը մեկնարկել էր սեպտեմբերի 16-ին և տևել մինչև նոյեմբերի 14-ը։ Նախաձեռնող խմբի ղեկավարը «Հանրապետություն» կուսակցության անդամ Արտակ Զեյնալյանն է։ «Հանրաքվեի մասին» սահմանադրական օրենքի համաձայն՝ հանրաքվե նախաձեռնելու համար անհրաժեշտ է նվազագույնը 50,000 վավեր ստորագրություն։ Նախաձեռնող խմբին հաջողվել է ստանալ համապատասխան ստորագրությունները։