Վարչապետ Նիկոլ Փաշինյանը հայտնել է, թե որ դեպքում Հայաստանը կհրաժարվի Ադրբեջանի դեմ միջազգային հայցերից
Հայաստանի վարչապետ Նիկոլ Փաշինյանը հունվարի 31-ին մամուլի ասուլիսում հայտարարել է, որ քննարկվում է ոչ միայն միջազգային ատյաններից Ադրբեջանի դեմ հայցերը հետ կանչելու հարցը, այլև այդ վեճերից ընդհանրապես հրաժարվելը։ Նա նաև մանրամասնեց, թե ինչ է նշանակում փոխադարձաբար հրաժարվել հայցերից։
Հակառակ դեպքում կարող է ստացվել մի իրավիճակ, որ մենք ինչ-որ մի հարց հետ քաշեցինք, Ադրբեջանն էլ հետ քաշեց իր հայցերը, այսինքն՝ մենք պայմանավորվեցինք, որ դա չենք տանում միջազգային ատյաններ, բայց եթե հաջորդ փուլում Ադրբեջանը երկկողմ հարաբերություններում դա դնի սեղանին, դրա շուրջ կարող են լինել էսկալացիաներ։
Վարչապետը կարծում է, որ եթե փոխադարձաբար վեճերից հրաժարվելու տարբերակը չլինի, ապա մենք մեր ճանապարհը փակած կլինենք հնարավոր էսկալացիան կառավարելու համար։
Հետևաբար, ըստ նրա, եթե մենք այդ վեճերից հրաժարվում ենք ընդհանրապես, դա կարող է ընդունելի լինել, և հիմա այդ ուղղությամբ աշխատանքներ են տարվում։