Ռոման Բերեզովսկին նշանակվել է Հայաստանի ռուսական համայնքի ղեկավար
Լեգենդար դարպասապահ, Հայաստանի ֆուտբոլի ազգային հավաքականի նախկին ավագ Ռոման Բերեզովսկին ընտրվել է Հայաստանի ռուսական համայնքի ղեկավար։ Այս մասին հայտնում է «Հայաստանի ռուսական համայնք» կազմակերպության տեղեկատվական հարթակը։
Բերեզովսկին մամուլի ասուլիսում նշել է, որ ընդունել է առաջարկը, քանի որ ուզում է իր փորձը հասարակական ոլորտում օգտագործել։
Թիմային ոգին միշտ էլ եղել է իմ կյանքի մի մասը, եւ տարիների ընթացքում հասկացա, որ կարևոր է ոչ միայն խաղադաշտում լինել, այլեւ օգնել խաղից դուրս։ Վերջին տարիներին մեր հայրենակիցների ու ռուս համայնքի միջև շփումները ուժեղանում են, և ես ուզում եմ նպաստել այս գործընթացին։ Իմ համար պարտականությունը նույնքան ամուր է, որքան երբ թևկապով էի գլխավորում ազգային հավաքականը,- ասել է նա։
Նոր պաշտոնում Բերեզովսկին իր առաքելությունը համարում է հայ-ռուսական հարաբերությունների համակողմանի ամրապնդումը։
Բերեզովսկին հայկական հավաքականում նորամուտը նշել է 1996 թվականի օգոստոսի 31-ին։ Ընդհանուր առմամբ հանդես եկել է 94 խաղում։
Հիշեցնենք, որ այս տարվա մայիսին Երևանում կայացած ՌԴ ԱԳ նախարար Սերգեյ Լավրովի և հայրենակիցների հանդիպման ընթացքում Ռոման Բերեզովսկին ռուս նախարարին նվիրել էր ինքնագրով ֆուտբոլային գնդակ։