Առաջիկայում Հայաստանը կունենա ԵՄ վիզաների ազատականացման գործողությունների ծրագիր
Ներքին գործերի նախարար Արփինե Սարգսյանը փետրվարի 25-ին մասնակցել է Հայաստան-ԵՄ խորհրդարանական գործընկերության կոմիտեի 4-րդ նիստին։ Նախարար Արփինե Սարգսյանը կարևորել է Հայաստան-ԵՄ վիզաների ազատականացման երկխոսության գործառնական փուլի մեկնարկը և ընդգծել, որ գործընթացն ինքնանպատակ լինել չի կարող։
Վիզաների ազատականացման շուրջ երկխոսության այս փուլում մենք ի վերջո խոսակցությունների մակարդակից անցում ենք կատարում գործնական փուլի։ Դա նշանակում է, որ արդեն իսկ որոշակի քայլեր ձեռնարկվել են և կա կամք շարունակելու այդ ուղղությամբ աշխատանքը, -ասել է ՆԳ նախարարը։
Արփինե Սարգսյանն ընդգծել է, որ այս ուղղությամբ առաջին քայլն արդեն իսկ արված է։ ԵՄ տեխնիկական առաքելության հետ հանդիպումների շրջանակում քննարկվել են որոշակի տեխնիկական հարցեր։ Առաջիկայում սպասվում է երկրորդ առաքելությունը։ Նա նշել է, որ նախնական պլանավորմամբ՝ առաջիկայում կունենան այն գործողությունների ծրագիրը, որը հնարավորություն կտա տարբեր ոլորտներում Հայաստանի համար սահմանել մարդկանց կենսագործունեության բարելավմանը միտված ժամանակակից բարձր ստանդարտներ։