Կառավարությունը մերժեց եկամուտների հայտարարագրումը չեղարկելու ընդդիմության նախագիծը
Հայաստանի կառավարությունն այսօրվա նիստում մերժեց ֆիզիկական անձանց եկամուտների հայտարարագրման համակարգի կիրառությունը չեղարկելու մասին ընդդիմության օրենսդրական նախագիծը։
Կառավաարությունը պարզաբանեց, որ համակարգի չեղարկումը սկզբունքորեն անընդունելի է և չի համապատասխանում 2021-2026 թվականների ծրագրին։ Ֆինանսների նախարարությունը շեշտեց, որ այս համակարգը կարևոր է, քանի որ այն նաև հիմք է սոցիալական կրեդիտների համակարգի ներդրման համար։
Նախագիծը չի բխում ՀՀ կառավարության 2021–2026 թթ. ծրագրով սահմանված քաղաքականության ուղղություններից, ըստ որի` ներդրվելու է ֆիզիկական անձանց եկամուտների հայտարարագրման գործուն համակարգ, որը կնպաստի նաև միջազգային պրակտիկայում լայնորեն կիրառվող «սոցիալական կրեդիտների» համակարգի ներդրմանը,– նշեց Վահե Հովհաննիսյանը։
Հարցին անդրադարձավ նաև Նիկոլ Փաշինյանը, նշելով, որ որոշումը իրենց համար բարդ է եղել, բայց կարևոր։ Նրա խոսքով՝ դրանից օգտվում են համայնքները։
Այս պատմությունը սկիզբ է առնում 2018 թվականից, երբ մենք նախաձեռնեցինք շատ կարևոր օրենսդրական փոփոխություն, որը վերաբերում էր համահարթ եկամտային հարկ սահմանելուն, ուզում եմ հիշեցնել, որ այդ ժամանակ Հանրապետությունում գործում էր 3 սանդղականի եկամտային հարկ՝ 23 տոկոս, 27 տոկոս և 35 տոկոս։ Այժմ մենք ունենք 20 տոկոս եկամտային հարկ, — հայտարարեց Նիկոլ Փաշինյանը։
Օրինագիծը ներկայացրել էր «Հայաստան» խմբակցությունը, որը պնդում էր, որ համակարգը ոչ լիարժեք է, ավելորդ վարչարարություն է ստեղծում քաղաքացիների համար և կրկնակի բեռ դառնում պետության համար։
Ֆիզիկական անձանց եկամուտների համընդհանուր հայտարարագրման համակարգը ժամանակավրեպ է, դրված նպատակի տեսանկյունից՝ ոչ լիարժեք և ոչ համարժեք, իսկ քաղաքացիների համար դառնալու է նոր և ավելորդ վարչարարություն, անիմաստ պարտավորություն և տուգանքի հիմք, իսկ պետության տեսանկյունից դառնում է արդեն իսկ առկա տեղեկատվության կրկնակի կամ եռակի հավաքագրման անիմաստ և անարդյունավետ գործընթաց, — հիմնավորման մեջ նշել էր Հայաստան կուսակցությունը։
Հիշեցնենք, որ հարկվող եկամուտ ստացած քաղաքացիները պետք է հայտարարագիր ներկայացնեն մինչև նոյեմբեր։ Եթե հայտարարագիր ներկայացնող անձը կատարել է սոցիալական ծախս, ապա ունի փոխհատուցման իրավունք։