Ադրբեջանի բեռները Հայաստանով կարող են անցնել Նախիջևան
Հայաստանի Ազգային ժողովի արտաքին հարաբերությունների մշտական հանձնաժողովի հերթական նիստի ժամանակ Հայաստանի արտաքին գործերի նախարար Արարատ Միրզոյանը հայտարարել է, որ Ադրբեջանի բեռները Հայաստանով կարող են անցնել Նախիջևան։ Չնայած «Խաղաղության խաչմերուկ» ծրագրի ամբողջական տարբերակը դեռ հասանելի չէ, սակայն կառավարության ներկայացուցիչները աստիճանաբար «բացում են» բովանդակությունը։
Մեր արած առաջարկի համաձայն՝ բեռները կարող են Ադրբեջանից հատել Հայաստանի սահմանը հատկապես և առաջին փուլում, օրինակ, Մեղրու երկաթգծով, այսինքն՝ ամենահարավային մասում, և կրկին հատել Հայաստանի սահմանը, դուրս գալ, մտնել Նախիջևան: Մենք էլ հնարավորություն կունենանք օգտագործել Նախիջևանի տարածքը, մասնավորապես՝ երկաթգիծը՝ մեր բեռները նույնկերպ ուղարկելու ուղիղ հարավ: Երկու երկրները կարող են նույն կերպ օգտագործել միմյանց, օրինակ, երկաթուղային ցանցը նաև միջազգային փոխադրումների համար: Եթե սա իրականություն դառնա, մենք կարող ենք երկաթուղով ապրանք ստանալ Չինաստանից, և դա գա, Հայաստանով անցնի, գնա արևմուտքով, Թուրքիայով, հասնի այնտեղ, որտեղ վերջանում է դա: Լավ, մուլտիմոդալով կարելի է, ասենք, Միջերկրականը հատել նավով և շարունակել… Այսինքն՝ հնարավորությունները երկու երկրների համար հավասար են, — հայտարարել է Արարատ Միրզոյանը։
Դեռևս մարտի սկզբին իրանական լրատվամիջոցին տված հարցազրույցում Նիկոլ Փաշինյանը հայտարարել էր, որ «Հայաստանի և Ադրբեջանի միջև երկաթուղու վերաբացումն այս համատեքստում շատ կարևոր թեմա է»։
Այս համատեքստում կարևոր են նաև Ադրբեջանից Ադրբեջան, այսինքն՝ կամ արևմտյան Ադրբեջանից Հայաստանի Հանրապետության տարածքով դեպի Նախիջևան և Հայաստանի Հանրապետությունից Ադրբեջանի, ավելի ճիշտ՝ Նախիջևանի տարածքով դեպի Հայաստան երկաթուղային կապի վերականգնումը։
Թե կոնկրետ ինչ կետեր կան խաղաղության պայմանագրում այս թեմայի վերաբերյալ, դեռ պարզ չէ։ Այնուամենայնիվ հարցը կարող է հասարակական քննարկումների առիթ դառնալ։