Ժիրայր Սեֆիլյանը հարցաքննվել է Հոկտեմբերի 27-ի գործով՝ Սամվել Բաբայանի հայտարարությունների հիման վրա
Հոկտեմբերի 27-ի ահաբեկչության գործի շրջանակում հարցաքննվել է «Ազգային ժողովրդավարական բևեռ» կուսակցության խորհրդի անդամ Ժիրայր Սեֆիլյանը։ Տեղեկությունը հաստատել են ՀՀ Քննչական կոմիտեից՝ արձագանքելով վերջին շաբաթներին հանրային քննարկման վերածված հայտարարություններին։
Հարցաքննությունը տեղի է ունեցել գործի անջատված մասի շրջանակում, և իրավապահների ուշադրության պատճառը դարձել է Արցախի անվտանգության խորհրդի նախկին քարտուղար Սամվել Բաբայանի հարցազրույցը։ Բաբայանը, անդրադառնալով 1999թ. հոկտեմբերի 27-ին կատարված ահաբեկչությանը, պնդել էր, թե այդ օրը զանգ ստացել է Սեֆիլյանից, ով վիրավորական կերպով հաղորդել է վարչապետ Վազգեն Սարգսյանի սպանության մասին՝ ասելով «մորուքը սատկել է, մորուքին սպանել են»։ Բաբայանի խոսքերով՝ այդ զանգի ձայնագրությունը դեռ պահվում է ԱԱԾ-ում։
Մայիսի 8-ին Բաբայանի այս պնդումներին անդրադարձավ նաև ԱԺ պաշտպանության հանձնաժողովի նախագահ Անդրանիկ Քոչարյանը՝ խորհրդարանում հարց ուղղելով գլխավոր դատախազ Աննա Վարդապետյանին։ Վերջինս արձագանքեց, որ պատգամավորը կարող է գրավոր ուղարկել այդ տեղեկությունը՝ եթե այն կարող է հետաքրքրել նախաքննական մարմնին։
Քոչարյանի հայտարարությունից չորս օր անց Սեֆիլյանը հրավիրվեց հարցաքննության։ «Ազգային ժողովրդավարական բևեռ»-ը հրապարակած հայտարարության մեջ նշում է, որ հարցաքննության ընթացքում որևէ նոր տեղեկություն չի հայտնաբերվել, իսկ Սեֆիլյանին վերագրվող արտահայտությունները ներկայացվում են որպես քաղաքական շահարկում։
Սեֆիլյանը «Ազատությանը» տված հարցազրույցում հերքել է իր մասնակցությունը նման խոսակցությանը՝ դրանք անվանելով «կեղծիք» և «անհեթեթություն»։ Նա հավելել է, որ դեռ 25 տարի առաջ արդեն հարցաքննվել է այս գործով, և այս նոր զարգացումները քաղաքական դրդապատճառներ ունեն։ Սեֆիլյանի խոսքով՝ իրավապահներն այս անգամ ևս որևէ ապացույց չեն ներկայացրել իր և Բաբայանի խոսքերի միջև կապ հաստատելու համար։
Նա հրաժարվել է մանրամասնել՝ ինչու է 1999 թվականի հոկտեմբերի 27-ին զանգահարել Սամվել Բաբայանին, նշելով, որ մանրամասները կարելի է պարզել, երբ կհրապարակվի հարցաքննության սղագրությունը։
Դեռևս հայտնի չէ՝ արդյոք Սամվել Բաբայանն ինքն էլ է կանչվել հարցաքննության իր հրապարակային պնդումների առնչությամբ։
Հիշեցնենք՝ 1999թ. հոկտեմբերի 27-ին զինված հանցախումբը, Նաիրի Հունանյանի գլխավորությամբ, ներխուժել էր Ազգային ժողովի նիստերի դահլիճ և սպանել ԱԺ նախագահ Կարեն Դեմիրճյանին, վարչապետ Վազգեն Սարգսյանին, փոխխոսնակներ Ռուբեն Միրոյանին ու Յուրի Բախշյանին, նախարար Լեոնարդ Պետրոսյանին և ևս երեք պատգամավորների։ Գործով դատավարությունն ավարտվել է 2003-ին. յոթ մեղադրյալ դատապարտվել են ցմահ ազատազրկման, մեկ անձ՝ 14 տարվա ազատազրկման։
Այնուամենայնիվ, տարիների ընթացքում այս գործով շարունակվել են տարբեր վարկածների ու կասկածների քննարկումները։