Պետական եկամուտների կոմիտեն չի ժխտում Ադրբեջանի հետ բեռնափոխադրումների մասին նորությունները
Հայաստանի կառավարությունը արդեն չի ժխտում Ադրբեջանի հետ բեռնափոխադրումների մասին նորությունները։ ՀՀ Պետական եկամուտների կոմիտեն վերահսկելու է Ադրբեջանից Հայաստանի տարածքով անցնող բեռների շարժը՝ իր իրավասությունների սահմաններում՝ ինչպես ցանկացած այլ սահմանի դեպքում։ Այս մասին Ազգային ժողովում լրագրողների հետ ճեպազրույցում հայտարարեց ՊԵԿ նախագահ Էդուարդ Հակոբյանը։
Նրա խոսքով՝ կոմիտեի խնդիրն է ցանկացած սցենարի դեպքում ապահովել մաքսային վերահսկողության պատշաճ իրականացում։
Եթե խոսում ենք ապաշրջափակման, սահմանների բացման մասին, ուղղակի պետք է տարբեր սցենարների պատրաստ լինել։ Մենք ունենք համապատասխան սարքավորումներ և գործիքներ, որոնք թույլ կտան ադապտացվել ցանկացած սցենարի և իրականացնել մեր մաքսային գործունեությունը։ Ունենք ռիսկերի համակարգ, որտեղ ավտոմատ կերպով որոշ ցուցիչներ ուսումնասիրելով՝ ապրանքները կարող են դասակարգվել կանաչ, դեղին կամ կարմիր ուղիներով։ Կանաչ ուղին նշանակում է, որ բեռը կարող է առանց լրացուցիչ հսկողության անցնել սահմանը։ Կամ ավտոմատ բացթողնման համակարգն արդեն պիլոտավորել ենք, որի դեպքում առանց ռիսկի բեռները մուտք են գործում երկիր, — ասաց նա։
Անդրադառնալով Երևանի կողմից Բաքվին առաջարկվող «դյուրացված ընթացակարգերով բեռների անցման» հնարավորությանը՝ Հակոբյանը նշեց, որ նման մեխանիզմներ արդեն գործում են Հայաստանի և այն երկրների միջև, որոնց հետ բաց սահմաններ կան՝ մասնավորապես Իրանի և Վրաստանի։
Դեռևս մարտի սկզբին իրանական լրատվամիջոցին տված հարցազրույցում Նիկոլ Փաշինյանը հայտարարել էր, որ «Հայաստանի և Ադրբեջանի միջև երկաթուղու վերաբացումն այս համատեքստում շատ կարևոր թեմա է»։
Չնայած «Խաղաղության խաչմերուկ» ծրագրի ամբողջական տարբերակը դեռ հասանելի չէ, սակայն կառավարության ներկայացուցիչները աստիճանաբար «բացում են» բովանդակությունը։
Մեր արած առաջարկի համաձայն՝ բեռները կարող են Ադրբեջանից հատել Հայաստանի սահմանը հատկապես և առաջին փուլում, օրինակ, Մեղրու երկաթգծով, այսինքն՝ ամենահարավային մասում, և կրկին հատել Հայաստանի սահմանը, դուրս գալ, մտնել Նախիջևան: Մենք էլ հնարավորություն կունենանք օգտագործել Նախիջևանի տարածքը, մասնավորապես՝ երկաթգիծը՝ մեր բեռները նույնկերպ ուղարկելու ուղիղ հարավ: