Իրանի վրա հարվածները սպառնալիք են նաև Հայաստանի համար
Իսրայելի կողմից Իրանի դեմ իրականացված հարվածները լուրջ սպառնալիք են ոչ միայն Մերձավոր Արևելքի, այլև Հայաստանի համար։ Այս մասին հունիսի 13-ին «APRI Armenia» համաժողովում հայտարարել է ՀՀ անվտանգության խորհրդի քարտուղար Արմեն Գրիգորյանը՝ հավելելով, որ Հայաստանը դեռ վաղուց սկսել է նախապատրաստվել նման զարգացումներին։
Հայաստանի անվտանգության հիմնական սպառնալիքը շարունակում է մնալ դասական անվտանգային սպառնալիքը, այսինքն՝ ռազմական սպառնալիքը ոչ միայն Հայաստանում, այլև տարածաշրջանում։ Այսօր տեղի ունեցածը ոչ միայն Իրանի կամ Մերձավոր Արևելքի համար է սպառնալիք, այլև Հայաստանի համար խնդիր է։ Հայաստանը շարունակում է աշխատել, որպեսզի կարողանա իր մասնաբաժին կայունությունը տարածաշրջան բերելու։ Մենք արդեն սկսել ենք նախապատրաստական աշխատանքներ, պլանավորել ենք գործողությունները ըստ հնարավոր զարգացումների։ Այսինքն՝ ունենք պլանավորում, որով առաջնորդվելու ենք ըստ իրավիճակի, — նշել է Գրիգորյանը։
Նա ընդգծել է, որ սա Իրանի տարածքային ամբողջականության դեմ ուղղված ոտնձգություն է, որն ապակայունացնող ազդեցություն է ունենալու ողջ տարածաշրջանի վրա։ Հայաստանի անվտանգության խորհրդում քննարկվում են տարբեր սցենարներ՝ Ադրբեջանի կողմից հնարավոր ագրեսիայի պայմաններում, հաշվի առնելով նաև Թուրքիայի և Ադրբեջանի զորավարժությունները Նախիջևանում։
Անդրադառնալով հարցին, թե Իսրայելի հարձակումը ինչպես կարող է ազդել Հայաստանի վրա, Գրիգորյանը նշել է՝ պետք է որոշ ժամանակ անցնի՝ այդ ազդեցությունը գնահատելու համար։ Նա նաև հայտնել է, որ այս պահին Անվտանգության խորհրդի նիստ չի նախատեսվում, սակայն անհրաժեշտության դեպքում այն կկազմակերպվի։
Հիշեցնենք, որ հունիսի 13-ի վաղ առավոտյան Իսրայելի պաշտպանության բանակը հարվածներ է հասցրել Իրանի տարբեր շրջաններում՝ թիրախավորելով ինչպես ռազմական, այնպես էլ միջուկային ենթակառուցվածքներ։ Իսրայելի թիրախում էին Թեհրանը, Թավրիզը, Սպահանը, Իլամը, ինչպես նաև Նաթանզի միջուկային օբյեկտը։ Զոհվել են միջուկային ոլորտի կարևոր մասնագետներ և բարձրաստիճան զինվորականներ։ Իրանի առաջնորդը հարվածները հանցագործություն է անվանել՝ սպառնալով Իսրայելին «դառը ու սարսափելի ճակատագրով»։
Իսրայելի վարչապետ Բենիամին Նեթանյահուն հայտարարել է, որ իրենք «երկար ժամանակ լինելու են առաջնագծում, շատ ավելի երկար, քան նախկինում սովոր էին»: