Հայաստանը միացել է ծովային կենսաբազմազանության պահպանման միջազգային նոր համաձայնագրին
Հայաստանը միացել է ծովային կենսաբազմազանության պահպանմանն ուղղված նոր միջազգային փաստաթղթին։ Օվկիանոսի հարցերով ՄԱԿ-ի երրորդ համաժողովի ընթացքում արտգործնախարար Արարատ Միրզոյանը ստորագրել է համաձայնագիր։ Այն կարգավորում է ծովային կենսաբազմազանության պահպանությունն ու կայուն օգտագործումը՝ ազգային իրավազորությունից դուրս ընկած ջրերում։
Ինչպես հայտնում է Հայաստանի արտաքին գործերի նախարարությունը, համաձայնագիրը մշակվել է ՄԱԿ-ի ծովային իրավունքի կոնվենցիայի շրջանակում և առաջինն է, որը իրավական դաշտ է սահմանում համաշխարհային օվկիանոսների չպաշտպանված տարածքների կենսաբազմազանության պահպանության համար։
Նույն օրը փաստաթուղթը ստորագրել են ևս 17 երկիր։ Դրա արդյունքում ստորագրող պետությունների թիվը հասել է 134-ի։ Մինչ այս պահը 50 երկիր արդեն վավերացրել էր համաձայնագիրը, այդ թվում՝ 18-ը համաժողովի ընթացքում կազմակերպված արարողության ժամանակ։