Ռուսաստանի և Ադրբեջանի հարաբերությունները կրկին սրվել են
Ռուսաստան-Ադրբեջան հարաբերությունները նոր լարվածության փուլում են՝ պայմանավորված վերջին օրերին Եկատերինբուրգում տեղի ունեցած իրադարձություններով։ Ռուսաստանը հայտարարում է, որ ձերբակալել է մի խումբ ադրբեջանցի քաղաքացիների, ովքեր կասկածվում են որպես «էթնիկ հանցախմբի» անդամներ և ներգրավված են մի շարք սպանությունների ու սպանության փորձերի մեջ, որ տեղի են ունեցել 2001, 2010 և 2011 թվականներին։ Ըստ ՌԴ Քննչական կոմիտեի՝ մի քանի կասկածյալներ արդեն տվել են ինքնախոստովանական ցուցմունքներ։
Բաքուն խստորեն արձագանքել է այս գործողություններին։ Ադրբեջանի արտաքին գործերի նախարարությունը հունիսի 28-ին կանչել է Մոսկվայի դեսպանատան ներկայացուցիչին՝ նրան փոխանցելով պաշտոնական բողոք։ Ադրբեջանը դժգոհել է, որ ռուսական անվտանգության ծառայությունները իրականացրել են «հարձակումներ» իրենց հայրենակիցների տների վրա, ինչի արդյունքում եղել են զոհեր, ծանր վիրավորներ և առնվազն 9 մարդ ձերբակալվել է։
Ի նշան բողոքի՝ Ադրբեջանը որոշել է բոյկոտել Մոսկվայում կայանալիք միջխորհրդարանական հանձնաժողովի 23-րդ նիստը։ Ադրբեջանի պատվիրակությունը չի մեկնի Ռուսաստանի մայրաքաղաք։ Բացի այդ, Ադրբեջանի մշակույթի նախարարությունը հայտարարել է, որ չեղարկվում են Ռուսաստանի պետական և մասնավոր կառույցների կողմից կազմակերպված բոլոր մշակութային միջոցառումները՝ համերգներ, փառատոններ, ցուցահանդեսներ և այլն։