Հայաստանի ԱԳ նախարար Արարատ Միրզոյանը չի մասնակցում ՀԱՊԿ արտգործնախարարների նիստին
Հայաստանի արտաքին գործերի նախարար Արարատ Միրզոյանը չի մեկնել Ղրղզստան՝ մասնակցելու Հավաքական անվտանգության պայմանագրի կազմակերպության (ՀԱՊԿ) արտգործնախարարների խորհրդի նիստին, որը մեկնարկել է հունիսի 30-ին Ղրղզստանում՝ Չոլպոն Աթայում։
Հայկական կողմը առայժմ չի ներկայացրել պաշտոնական մեկնաբանություն։
Հայաստանը 2024 թվականի սկզբին հայտարարեց, որ սառեցնում է մասնակցությունը ՀԱՊԿ միջոցառումներին։ Երևանը հրաժարվել է իր ֆինանսական բաժինը փոխանցել կառույցին, չի մասնակցում համատեղ զորավարժություններին և պաշտոնական հանդիպումներին։ Թեպետ Հայաստանը դեռևս պաշտոնապես դուրս գալու գործընթաց չի սկսել, շարունակում է քննադատել կազմակերպության գործունեությունը՝ հատկապես 2022 թվականին Ադրբեջանի կողմից Հայաստանի տարածք ներխուժումից հետո անգործության համար։
Հունիսի 21-ի հարցազրույցներից մեկի ժամանակ Ռուսաստանի փոխարտգործնախարար Ալեքսանդր Պանկինը նշել էր, որ Հայաստանը պետք է սթափ գնահատի իր անվտանգության ապահովման հնարավորությունները, այդ թվում՝ կոլեկտիվ ձևաչափում։
ՀԱՊԿ անդամ են Հայաստանը, Ռուսաստանը, Բելառուսը, Ղազախստանը, Ղրղզստանը և Տաջիկստանը։