ՀԷՑ-ի տնօրենի տեղակալը դիմել է դատարան՝ իր պաշտոնին վերադառնալու համար
«Հայաստանի էլեկտրական ցանցեր» ընկերության տնօրենի տեղակալի պաշտոնից ազատված Դավիթ Ղազինյանը դատարան է դիմել։ Ղազինյանը պահանջում է իրեն վերականգնել ՀԷՑ-ի գլխավոր տնօրենի տեղակալի պաշտոնում։ Ղազինյանը պնդում է՝ իր ազատումը եղել է անօրինական։
Իմ հրաժարականի մասին որևէ խոսք չի եղել։ Նույնիսկ հրապարակայնորեն եմ հայտարարել, որ հրաժարականի մտադրություն չունեմ։ Բայց հանկարծ մի օր տեղեկացա՝ պաշտոնանկ եմ արվել։ Այսօր իմ փաստաբաններն արդեն դիմել են դատարան, – պատմել է նա։
Նրա խոսքով՝ իրեն ազատելու որոշումը կայացրել է ՀԷՑ-ի ժամանակավոր կառավարիչ Ռոմանոս Պետրոսյանը, սակայն առանց իրավական լիազորություն ունենալու։
Պետրոսյանը նախ պետք է ներկայացներ հարցը Տնօրենների խորհրդին, հետո միայն հնարավոր լիներ ինձ ազատել։ Նա պարզապես մի կողմ դրեց ընթացակարգը։ Որպես հիմք էլ մատնանշել է իմ ճեպազրույցը և մի քանի արտահայտություններ անվստահության մասին։ Չգիտեմ՝ ոնց չափեց այդ անվստահությունը, բայց փաստը մնում է փաստ՝ մի ժամում որոշում կայացրեց ինձ ազատելու մասին», – նշել է Ղազինյանը։
Նշենք, որ «Հայաստանի էլեկտրական ցանցեր» (ՀԷՑ) ՓԲԸ-ի գործադիր տնօրենի պաշտոնակատար և վաճառքի տնօրեն Դավիթ Ղազինյանը հայտարարել է, որ չի պլանավորում հրաժարականի դիմում գրել: Նա հավելել է, որ անձամբ չի վստահում Պետրոսյանին և երկրի իշխանություններին:
Ռոմանոս Պետրոսյանը նշանակվել է ՀԷՑ-ի ժամանակավոր կառավարիչ հուլիսի 18-ին՝ Հանրային ծառայությունները կարգավորող հանձնաժողովի նախագահի որոշմամբ՝ վարչական վարույթի և ՀԾԿ-ի դեմ կանխարգելիչ միջոցառումների կիրառման շրջանակներում: