Գնունու շուկայի կրպակները քանդվում են․ վաճառականները մնում են առանց աշխատանք
Այսօր վաղ առավոտից Երևանի քաղաքապետարանի աշխատակիցները սկսել են ապամոնտաժել Գնունու շուկայի մոտ գտնվող կրպակներն ու տաղավարները։ Քաղաքապետ Տիգրան Ավինյանի որոշմամբ՝ տարածքը պետք է ազատվի, քանի որ այդ շինությունները ժամանակին կառուցվել են առանց թույլտվության և հողօգտագործման իրավունքի։
Քաղաքապետարանը վստահեցնում է, որ գործընթացի մասին տնտեսվարողները վաղուց էին տեղեկացված։ Նրանց տրվել էր ժամանակ մինչև սեպտեմբերի 30–ը՝ ապրանքները տեղափոխելու և տարածքը ազատելու համար։ Քաղաքաշինության և հողի վերահսկողության վարչության տեղակալ Ռուբեն Խոջայանը լրագրողների հետ զրույցում նշեց, որ այսօր քանդվող կրպակներում արդեն ապրանք չի եղել․
Որևէ կրպակում ապրանք չկա։ Մենք ամիսներ շարունակ բանակցել ենք, մարդիկ նախապես տեղեկացված էին,– ասաց նա։
Քաղաքապետարանը տնտեսվարողներին նոր տարածք տրամադրելու հարցը չի քննարկել։ Խոջայանը նշեց, որ նման առաջարկ կամ պահանջարկ պարզապես չի եղել։ Միայն այն տնտեսվարողների մասով, որոնց վարձակալության պայմանագրերի ժամկետները դեռևս կադաստրում չեն լուծարվել, այս պահին գործողություններ չեն իրականացվում։
Amnews-ի հետ զրույցում կրպակատերերից մեկը, ով չցանկացավ նշել իր անունը, հայտնում է, որ քաղաքապետարանը նախազգուշացրել է ապամոնտաժելու մասին, սակայն իրենց հարցերն ու խնդրանքները անպատասխան են մնացել։
Մենք հողավճար ենք տվել, հարկ ենք տվել, մեր կրպակներն էլ տարիներ շարունակ են աշխատել։ Հարցրել ենք՝ ուրիշ տեղ կտա՞ք՝ պատասխան չի եկել։ Նախարարության կամ քաղաքապետարանին հարց ունեմ՝ ըմբռնո՞ւմ են, թե ինչպես են էսքան մարդիկ ապրելու հիմա։
Կրպակատերերից մեկն էլ մեկ այլ լրատվամիջոցի նշել էր, որ «հազիվ գիշերը հասցրել են ապրանքը հանել, տանել տուն, բանկից վարկերը վերցրել են, հիմա ոնց ենք մուծելու, չգիտեն»։
Այսպիսով՝ մի կողմում քաղաքապետարանն է, որը փորձում է «մաքրել» ապօրինի կառուցված տարածքները, մյուս կողմում՝ տասնյակ վաճառականներ, որոնք փաստացի կորցնում են իրենց եկամտի աղբյուրը։