Հասարակական տրանսպորտի 18 վարորդ ազատվել է աշխատանքից
Երևանի քաղաքապետարանի մամուլի խոսնակ Հայկ Կոստանյանը հայտարարել է, որ այսօր մայրաքաղաքում տեղի ունեցած գործադուլների հետևանքով 18 վարորդ արդեն ազատվել է աշխատանքից։ Գործադուլի արդյունքում մի շարք կանգառներից մարդիկ այդպես էլ չեն կարողացել հասնել իրենց անհրաժեշտ վայրը։ Քաղաքապետարանը այս քայլը ոչ թե գործադուլ է որակում, այլ շանտաժ՝ նշելով, որ գործադուլից 14 օր առաջ վարորդները պարտավոր էին զգուշացնել դրա մասին։
Նոյեմբերի 1-ից վարորդները այլևս չէին կարողանում ինքնուրույն հավաքել ուղևորավարձերը։ Դրանից հետո, ինչպես նշում էր քաղաքապետարանը, ստվերային քաղաքականությունը նվազել է։
Եթե մինչ նոյեմբերի 1-ի որոշումը հավաքագրվում էր աշխատանքային օրերին միջինում 30-31 միլիոն, մենք հիմա հասել ենք 35 միլիոն նշաձողին։ Շաբաթ կիրակի օրերին նախորդ 18-ի փոխարեն հավաքագրում ենք մոտ 23 միլիոն։ Ուզում եմ շատ պարզ ասել, որ այդ գումարի աճը պայմանավորված չէ նրանով, որ ավելի շատ մարդիկ են սկսել տրանսպորտից օգտվել։ Ուղղակի այն գումարը, որը առաջ գնում էր տարբեր մարդկանց գրպաններ, այլև՝ վարորդների, այժմ էլ չի գնում, — այս մասին լրագրողների հետ մամուլի ասուլիսում հայտարարել է Սուրեն Գրիգորյանը։
Վարորդներրը իրենք էլ այսօր խոստովանել էին, որ մինչև նոր համակարգի անցումը օրական նրանք ավել գումար էլ էին ստանում։ Այս համատեքստում նրանք անդրադարձել են նաև ավտբուսների վերջին կանգառներին՝ «կանեցներին» և նշել, որ այնտեղ նույնիսկ հիգիենայի տարրական պայմաններ չկան, զուգարաններ կա՛մ չկան, կա՛մ էլ սպասարկում են գումարով։
Մենք էն ժամանակ էլ ենք արտաժամ աշխատել, բայց որ առձեռն կար, էս հարցը չէինք բարձրացնում՝ մնացած հարցերը լուծում էինք՝ սկսած ավտոբուսի մաքրությունից մինչև զուգարան։ Առձեռն աշխատանքի պարագայում աշխատած օրը միջինում 4000 — 5000 դրամ ավել մնում էր վարորդներին։
Այսինքն՝ յուրաքանչյուր վարորդ 15 օր վարելուց և համապատասխան աշխատավարձից բացի կարողանում էր նաև ստանալ մոտ 60․000 մինչև 75․000 դրամ ավել գումար։