Կառավարությունը նախատեսում է անապահովության գնահատման նոր համակարգ ներդնել
Կառավարության որոշմամբ, 2025 թվականի մարտի 17-ից Հայաստանում կգործարկվի անապահովության գնահատման նոր համակարգ, որի հիմնական նպատակներից է երկրում ծայրահեղ աղքատության կրճատումը։ Ընտանիքների անապահովության մակարդակը կգնահատվի 4 աստիճանով՝ ծայրահեղ անապահով, չափավոր անապահով, միջին անապահով և անապահով։ Համապատասխանաբար ընտանիքները կստանան սոցիալական աջակցության տարբեր փաթեթներ, որոնք կարող են ներառել նպաստներ, կրթական ու առողջապահական արտոնություններ, կոմունալ ծառայությունների աջակցություն և այլն։
Նոր համակարգով ՝ գործող ընտանեկան նպաստների փոխարեն ներդրվում է անապահովության նպաստ, որը ստանալու իրավունք կտրվի այն ընտանիքներին, որոնց մեկ հաշվարկային անդամի հաշվով ամսական եկամտի չափը ցածր կլինի անապահովության սահմանային շեմից, այսինքն՝ պարենային զամբյուղի արժեքից: Իսկ 2025 թվականի համար, այս նախագծով չափահաս մարդկանց համար սահմանվում է 34 581 դրամ, որը Վիճկոմի տվյալներով՝ 2024 թ. երրորդ եռամսյակի համար հաշվարկված և հրապարակված են նվազագույն պարենային զամբյուղի չափի մասով: Օրինակ, եթե ունենք մեկ չափահաս անձ, որն ունի 0 եկամուտ, իր նպաստը կկազմի 34 581 դրամ: Գործող համակարգում նպաստի միջին չափը 33 000 դրամ է , իսկ այս նոր համակարգով միջին չափը կբարձրանա և կդառնա 49 330 դրամ, — նշել է Նարեկ Մկրտչյանը:
Նոր համակարգը պարտադրում է աշխատունակ անձանց ակտիվ ներգրավում կամ աշխատանքի տեղավորում։ Չաշխատող, բայց աշխատունակ անձանց դիմումը կդիտարկվի որպես աշխատանքի փնտրելու հայտ, իսկ աշխատանքի անցնելու դեպքում ընտանիքի եկամուտները 12 ամիս չեն հաշվարկվելու։ Սա նշանակում է, որ այդ ընտանիքները միանգամիզ չեն զրկվի նպաստի համակարգից։
Սյունիքի և Կոտայքի մարզերում ծրագիրը իրականացվելու է պիլոտային կարգով։ Բացի այդ 5000 ընտանիքի մասով փորձարկում է իրականացվել և արդյունքները համապատասխանել են սահմանված համակարգին։