2024-ին օդի աղտոտման 397 դեպք է արձանագրել
Բնապահպանության և ընդերքի տեսչական մարմնի (ԲԸՏՄ) 2024 թվականի գործունեության տարեկան հաշվետվության համաձայն՝ նախորդ տարում գրանցվել է օդի աղտոտման 397 դեպք։ 2024 թվականին Երևանում իրականացվել է 22 ստուգում՝ ներառյալ արտադրության, ընդերքօգտագործման, շինարարության, անասնաբուծության և այլ ոլորտներում։ Արդյունքում՝ կայացվել է 26 վարչական տուգանքի որոշում, կասեցվել է 17 տնտեսավարողի գործունեություն, որոնք գործել են առանց սահմանային թույլատրելի արտանետումների թույլտվության։ Հաղորդագրության համաձայն՝ իրավախախտումները հետևյալ ոլորտներում են.
— Շինարարություն – 207 դեպք, այդ թվում 104 շինհրապարակներում կանոնների խախտում, 103՝ առանց անթափանց ծածկոցի սորուն նյութերի տեղափոխում
— Արտադրություն – 74 դեպք
— Ընդերքօգտագործում – 61 դեպք
— Անասնաբուծություն և բուսաբուծություն – 15 դեպք
— Խոզանների, տերևների, թափոնների այրումից առաջացած ծխի արտանետումներ – 37 դեպք
— Սպասարկում – 3 դեպք
Տեսչական մարմնի կողմից կիրառվել է 291 վարչական տույժ, նշանակվել է 31,650,000 դրամի տուգանք, իսկ շրջակա միջավայրին հասցված վնասը հաշվարկվել է 2,354,528,016 դրամ։