Զոհված զինվորների ընտանիքներին հատկացված շենքը հանվել է աճուրդի
Մուրացան 110/1 հասցեում գտնվող շենքը, որտեղ բնակվում են զոհված զինծառայողների ընտանիքներ, աճուրդի է դրվել։ Բնակիչներն դատական գործընթացի մեջ են, սակայն, նրանց պնդմամբ, պետգույքի կառավարման կոմիտեն ճնշում է գործադրում՝ շենքը հոսանքազրկելով։
«Զինվորի մայր» հասարակական կազմակերպության նախագահ Մարգարիտա Խաչատրյանի խոսքով՝ շենքը նախկինում Պաշտպանության նախարարությանն էր պատկանում, սակայն փոխանցվել է Պետգույքի կոմիտեին, որը որոշել է այն վաճառքի հանել։
Մեզ այս տարածքը հատկացրել էր ՊՆ-ն, այստեղ գործում էին տարբեր ՀԿ-ներ, որոնք աջակցում էին զորքերին սոցիալական ու մշակութային ծրագրերով։ Հիմա մեզ վտարում են՝ առանց հաշվի առնելու, որ այստեղ ապրում են զոհվածների ընտանիքներ,- ասել է Խաչատրյանը։
Նրա խոսքով՝ դատարանի որոշում դեռ չկա, սակայն շենքն արդեն հոսանքազրկվել է, իսկ բնակիչներին առաջարկվել է այն գնել 400 միլիոն դրամով, ինչը նրանց համար մեծ գումար է։