Հայաստանի կառավարությունը առաջարկում է խստացնել պատիժները թմրամիջոցների ապօրինի շրջանառության համար

ՀՀ կառավարությունը ներկայացրել է օրենքի նախագիծ՝ խստացնելու քրեական օրենսգրքում թմրամիջոցների ապօրինի շրջանառության դեմ պայքարի պատժամիջոցները: Թմրա­նյութերի ապօրինի շրջանառության համար նախագծով առաջարկվում են այնպիսի պատժաչափեր, որպիսիք նախատեսված են ցեղասպանության, մարդ­կության դեմ ուղղված հանցագործությունների, պատերազմական ծանրագույն հանցագործությունների, ծանրացնող հանգամանքներով սպանության, պետա­կան դավաճանության, ահաբեկչության և այլնի դեպքում։

Մասնավորապես, թմրամիջոցների իրացման նպատակով ապօրինի շրջանառության համար պատժի չափը կբարձրանա՝ ներկայիս 3–6 տարվա փոխարեն կսահմանվի 5–8 տարվա ազատազրկում։ Եթե թմրամիջոցների շրջանառությունն իրականացվել է խոշոր չափերով, ապա կկիրառվի 14–20 տարվա ազատազրկում կամ նույնիսկ մինչև ցմահ ազատազրկում՝ ներկայում գործող առավելագույն 8 տարվա փոխարեն։ Առանց իրացման նպատակի՝ դրանց պատրաստման, պահպանման կամ տեղափոխման համար պատժի չափը կդառնա մինչև 3 տարվա ազատազրկում՝ ներկայիս 1 տարվա փոխարեն։

Հատուկ ուշադրություն է դարձվում անչափահասների ներգրավմամբ կատարվող հանցագործություններին։ Եթե որևէ մեկը թմրամիջոց է իրացրել անչափահասին, ապա նրան սպառնում է 4-ից 8 տարվա ազատազրկում։ Բացի այդ, առաջարկվում է օրենքում հատուկ նշել, որ անչափահասի ներգրավումը թմրամիջոցների հետ կապված հանցանքում համարվում է ծանրացուցիչ հանգամանք։

Նախագծով նաև առաջարկվում է օրենքից հանել այն դրույթները, որոնք թույլ էին տալիս նման հանցանքների դեպքում միայն տուգանք կիրառել՝ առանց ազատազրկման։ Այսուհետ կկիրառվեն միայն ազատազրկման տարբեր պատժատեսակներ, այդ թվում՝ կարճաժամկետ ազատազրկում՝ մինչև մեկ ամսով։