Տասնյակ քաղաքացիներ հայտնվել են բանկային զեղծարարությունների ցանցում․ Կենտրոնական բանկը պարզաբանումներ է տվել
Վերջին շաբաթներին ակտիվորեն շրջանառվող բանկային հնարավոր զեղծարարությունների թեման լուրջ անհանգստություն է առաջացրել քաղաքացիների շրջանում։ Տասնյակ քաղաքացիներ պնդում են, որ առանց իրենց գիտության՝ բանկային հաշիվներից գումարներ են հափշտակվել կամ վարկեր բացվել իրենց անունով։
Տուժածների հիմնական բողոքները վերաբերում են երեք բանկերին՝ «Այ ԴԻ Բանկ», «Ինեկոբանկ» և «Արդշինբանկ»։ Այս պահին Կենտրոնական բանկը ստացել է շուրջ 50 բողոք՝ կապված հենց այս բանկերի գործունեության հետ։
Ստացված բողոքների գերակշիռ մասի ուսումնասիրության արդյունքում պարզվել է, որ զեղծարարությունները հետևանք են հաճախորդների կողմից իրենց անձնական տվյալները և բանկերի կողմից տրված համապատասխան գաղտնաբառերն այլ անձանց փոխանցման, այնուամենայնիվ, զեղծարարությունների ներկայում տարածված սխեմաների հետ կապված ռիսկերը նվազեցնելու նպատակով Կենտրոնական բանկը բանկերին առաջարկել է հեռահար տարբերակով հաճախորդների նույնականացման գործընթացներում կիրառել առավել խստացված որոշակի լուծումներ, որոնց զգալի մասն արդեն ներդրված է, — նշված է հաղորդագրության մեջ։
Նախնական տվյալներով՝ զեղծարարությունների մեծ մասը կատարվել է քաղաքացիների անձնական տվյալների չարաշահման կամ փոխանցման միջոցով։ Սակայն Կենտրոնական բանկն ընդունում է, որ համակարգը նաև ինստիտուցիոնալ մարտահրավերների առաջ է կանգնած։
Միևնույն ժամանակ՝ հնարավոր զեղծարարության հետևանքով տուժած հաճախորդների հետ կապված միջանկյալ լուծումներ գտնելու շրջանակներում նշված բանկերն ընդունել են որոշումներ՝ 3-ից 5 տարի ժամկետով («Այ ԴԻ Բանկ»՝ 5 տարով, «Ինեկոբանկ»՝ 3 տարով և «Արդշինբանկ»՝ 3 տարով) հետաձգելու հաճախորդների պարտավորությունների մարումը. բանկերը սկսել են այս մասին իրենց հաճախորդներին տեղեկացման գործընթացը, ինչպես նաև տարածել են համապատասխան հաղորդագրություններ: Այս ընթացքում վարկառուներին վարկի մարման պահանջ չի ներկայացվի, վարկի նկատմամբ տոկոսներ չեն հաշվեգրվի՝ ակնկալելով, որ այդ ժամկետում համապատասխան քրեական վարույթների արդյունքներով կլինեն վերջնական իրավական գնահատականներ։