Կառավարությունը մերժեց Հայոց ցեղասպանության ժխտման քրեականացման նախաձեռնությունը
Մայիսի 22-ին կառավարությունը մերժեց «Հայաստան» խմբակցության առաջարկած օրինագիծը, որով առաջարկվում էր քրեականացնել Հայոց ցեղասպանության ժխտումը։ Կառավարությունը նշել է, որ նման փոփոխության նպատակահարմարությունը բացակայում է։
«Հայաստան» խմբակցությունը առաջարկում էր սահմանել տուգանք՝ նվազագույն աշխատավարձի 100–պատիկից 300–պատիկի չափով, կամ հանրային աշխատանքներ՝ 150–250 ժամ տևողությամբ, կամ ազատության սահմանափակում՝ մեկ ամսից մինչև 4 տարի ժամկետով։
Նախագիծը ներկայացվել էր Հայոց ցեղասպանության 110-րդ տարելիցին ընդառաջ։ Ապրիլի 22-ին Ազգային ժողովում «Հայաստան» խմբակցության քարտուղար Արծվիկ Մինասյանը հայտարարել էր նախագծի մասին, որը բուռն քննարկումների և վիճաբանությունների առիթ էր դարձել Ազգային ժողովի նիստերի դահլիճում։
Կառավարության որոշումը ենթադրում է, որ Հայոց ցեղասպանության ժխտման քրեականացումը ներկայումս նպատակահարմար չէ։