Բեռնատարների վարորդները բողոքի ակցիա են իրականացնում Կառավարության դիմաց․ պահանջում են անտեսված չլինել
Կառավարության շենքի դիմաց բեռնատարների վարորդները բողոքի ակցիա են իրականացնում։ Նրանք պահանջում են հանդիպում Հայաստանի վարչապետ Նիկոլ Փաշինյանի հետ՝ բարձրացնելու իրենց խնդիրները։ Վարորդները ցանկանում են, որպեսզի հայ բեռնափոխադրողների համար առաջնահերթություններ լինեն, քանի որ, ըստ ակցիայի մասնակից վարորդների մեկի, պատվիրատուները կամ միջնորդ կազմակերպությունները անտեսում են հայերին՝ նախապատվությունը տալով այլազգիների։
Խնդիրը կա արդեն շուրջ մեկ տարի։ Նրանք դիմել են տարբեր գերատեսչությունների, բայց խնդիրը դեռևս լուծում չի ստացել։ Իրավիճակը այսպես դարձավ, երբ Թուրքիայի քաղաքացիները Վրաստանում սկսեցին բացել վրացական բեռնափոխադրման կազմակերպություններ, թուրք վարորդներ բերեցին ու Վրաստանի բեռնափոխադրող մյուս ընկերությունների հետ միասին իրենք էլ հայաստանյան շուկա մտան որպես երրորդ երկրների բեռնափոխադրողներ։
Բեռնափոխադրում իրականացնող վարորդներից մեկը մեկ այլ խնդիր էլ նշեց:
Մենք ունենք մեքենա, որը գնել ենք վարկով։ Պետությունն էլ վարկերը բարձրացել է։ Մեր միջև կա լոգիստ կազմակերպություն, որը բեռը վերցնում է պատվիրատուից, տալիս է ներմուծողին, այսինքն՝ աշխատելով ինչ-որ մի գումար։ Հիմա Ռուսաստանում կանգնած մեքենաների շարքում կան նաև երրորդ երկրի փոխադրողներ։ Իրենք բեռնափոխադրում են կատարում մեր երկրում, որը Հայաստանում ավել հարկ չի վճարում, քան մենք, այսինքն` ինքը ավելի էժան հարկ է վճարում, դրանից ելնելով` սկսում է շուկայում անհավասար պայքար։
Վարորդները դժգոհ են, որ երրորդ երկրի բեռնափոխադրողները հայկական շուկայում գին են թելադրում։ Նրանցից մեկը բացատրում է իրավիճակը։
Մենք առաջարկում ենք բեռնատուին 2500 դոլար, օրինակ՝ վրացին առաջարկում է 2300 դոլար, որովհետև ինքը Հայաստանում հարկային պարտավորվածություն չունի պետության հանդեպ։
Բեռնափոխադրողները բախվում են նաև մեկ այլ խնդրի։
Պետությունը մեզ ասում է` ծախս ցույց տվեք Հայաստանում։ Եթե ես իմ բեռնափոխադրման կիլոմետրի մեջ Հայաստանում քշում եմ ընդամենը 500 կմ։ 4000 կմ քշում եմ Ռուսաստանում, վառելիքն էլ գնում եմ Ռուսաստանից։ Ո՞նց ծախս ցույց տամ։
Նշենք, որ բեռնափոխադրողները բողոքի ակցիա էին կազմակերպել նաև նախորդ տարվա օգոստոսին։ Այն ժամանակ ևս նրանք պահանջում էին անդրադառնալ ոլորտի խնդիրներին։