Երևանի քաղաքապետարանը չի կարողանա ձեռք բերել խոստացված 45 նոր տրոլեյբուսները․ պատճառը մարդկանց իրականացրած ակցիաներն են
Երևանի քաղաքապետարանը չի կարողանա ձեռք բերել նախատեսված 45 նոր տրոլեյբուսներ։ Այս մասին ճեպազրույցի ժամանակ հայտարարել է քաղաքապետարանի մամուլի խոսնակ Հայկ Կոստանյանը։ Նրա խոսքով՝ հիմնական խնդիրը քաղաքացիների կազմակերպած ակցիայի պատճառով գրանցված թերհավաքագրումն էր՝ հատկապես սկզբնական շրջանում, երբ տրանսպորտի գինը 100 դրամից հասավ 150-ի։
Այդ ակցիաների արդյունքում մարդկանց ամեն կերպ փորձում էին այնպես համոզել, որպեսզի չվճարեն՝ ասելով, որ գինը անիմաստ է բարձրացել և պետք է 100 դրամ մնար։ Այս տարի Երևանի քաղաքապետարանը նախատեսել էր և հայտարարել էր, որ ձեռք է բերելու շուրջ 45 տրոլեյբուս։ Բանից պարզվում է, որ այդ 45-ից 30-ը արդեն հնարավոր չի լինելու ձեռք բերել, որովհետև թերհավաքագրումները բերել են նրան, որ այդ գումարը չկա և հետևապես այդ 30 տրոլեյբուսները դուրս են եկել ցանկից։ Նման տեմպերով եթե շարունակվեն հավաքագրումները, չի բացառվում, որ այդ 15 տրոլեյբուսն էլ չկարողանանք ձեռք բերել, իսկ քաղաքապետարանը չի պատրաստվում այլ ոլորտից գումար կտրի և ներդնի հասարակական տրանսպորտի մեջ, — նշել է Կոստանյանը։
Հիշեցնենք, որ նախորդ տարի ձեռք էր բերվել 15 նոր տրոլեյբուս։
Տրանսպորտի խնդիրը դեռ սրվել էր հատկապես 2025 թվականին՝ միասնական տոմսային համակարգին անցնելու և տրանսպորտի վճարի թանկացման հետ կապված։ Բացի այդ՝ բողոքի ցույցեր են իրականացրել նաև վարորդները՝ կաթվածահար անելով քաղաքի երթևեկությունը։ Քաղաքապետարանը նրանց մեղադրում էր կանխիկ տրված 100 դրամանոցները յուրացնելու մեջ։ Վարորդներից ոմանք էլ խոստովանել էին այդ փաստը։
Այնուամենայնիվ, ինչպես երևում է, նոր փոփոխությունները թվերի մեջ մեծ տատանումներ չեն տվել։