Վերին Լարսը բաց է բոլոր տրանսպորտային միջոցների համար
Վրաստանից դեպի Ռուսաստան Վերին Լարս անցակետով հունվարի 20-ից բաց է բոլոր տեսակի տրանսպորտային միջոցների համար։
Վրաստանի ավտոճանապարհների դեպարտամենտի հաղորդմամբ՝ վերականգնվել է երթևեկությունը Մցխեթա–Ստեփանծմինդա–Լարս միջազգային նշանակության ավտոճանապարհի Գուդաուրի–Կոբի հատվածում։
Հունվարի 17-ի երեկոյան ձյան և մերկասառույցի պատճառով ծանրաքաշ բեռնատարների երթևեկությունը փակվել էր։ Եղանակի բարելավումից հետո ճանապարհը բացվել է նաև բեռնատարների համար։
Հիշեցնենք՝ «Վերին Լարսը» Հայաստանի և Ռուսաստանի միջև գործող միակ ցամաքային անցակետն է Վրաստանի տարածքով։
Փրկարար ծառայությունը և ավտոճանապարհների պատասխանատուները վարորդներին խորհուրդ են տալիս երթևեկել միայն ձմեռային անվադողերով և զգոն լինել լեռնային հատվածներում։
Հարկ է նշել, որ վերջին օրերին հեղուկ գազի գները աճել են շուրջ 100 դրամով։ Դրա վրա ազդել են ինչպես Լարսի փակումը, այնպես էլ Իրանում տեղի ունեցող իրադարձությունները։ Հարց է առաջանում, արդյոք Վերին Լարսի բացումը կազդի Հայաստանում հեղուկ գազի գների վրա։