Երևանի քաղաքապետարանը դժգոհ է կառուցապատման թույլտվությունների էլեկտրոնային հարթակից. համակարգը կարող է դադարեցվել
Երևանի քաղաքապետ Տիգրան Ավինյանը կոշտ քննադատության է ենթարկել կառուցապատման թույլտվությունների տրամադրման էլեկտրոնային հարթակը։ Քաղաքապետի խոսքով՝ համակարգը, որն արդեն վեց ամիս գործարկված է, լուրջ տեխնիկական ու կառուցվածքային խնդիրներ ունի, ինչը խոչընդոտում է թե՛ քաղաքաշինական գործընթացներին, թե՛ քաղաքացիների սպասարկմանը։
Հազարավոր քաղաքացիներ դժգոհ են, և եթե համակարգը շարունակի այսպես աշխատել, ստիպված կլինենք դադարեցնել դրա օգտագործումը։ Մենք չենք ընդունել այս օրենքը, բայց բողոքներն ուղղվում են մեզ,– նշել է Ավինյանը քաղաքապետարանի գործակարգավարական խորհրդակցության ժամանակ։
Քաղաքապետարանի իրավաբանական վարչության պետ Ալիկ Վարդազարյանը հաստատել է՝ հարթակի կիրառման ընթացքում շարունակ ի հայտ են գալիս խնդիրներ։ Նրա խոսքով՝ մի մասը լուծվում է տեղում, սակայն մի շարք խոտաններ շարունակում են անհարմարություններ առաջացնել ինչպես կառուցապատողների ու նախագծողների, այնպես էլ պետական ու համայնքային մարմինների համար։
Առկա են դեպքեր, երբ համայնքի եղեկավարի կողմից ստորագրված նախագիծը տեխնիկական խնդիների պատճառով հնարավոր չի լինում ներբեռնել համակարգ։ Որոշ խոշոր քաղաքաշինական ծրագրերի իրականացման համար համաձայնեցված նախագծերի հիման վրա հնարավոր չի լինում իրականացնել պետական գրանցում, քանի որ որոշ գերատեսչություններում համաձայնեցված նախագծերը չեն երևում։
Ավինյանը նշել է, որ էլեկտրոնային համակարգերի ներդրումը կարևորվում է, սակայն պետք է արվի առանց շտապողականության՝ փուլային, հիմնավորված լուծումներով, այլապես ամբողջ համակարգը կարող է պարզապես չգործել։