Ծիծեռնակաբերդի խճուղու փլուզված հատվածը վերականգնվել է, բայց հարակից տարածքներում շարունակում են դիտվել փլուզման ռիսկեր
Երևանի քաղաքապետարանը հայտարարել է, որ Ծիծեռնակաբերդի խճուղու փլուզված հատվածի վերականգնման աշխատանքներն արդեն ավարտված են։ Սակայն ճանապարհի հարակից հատվածներում ևս կան փլուզման ռիսկեր, ուստի այդ ուղղությամբ նախատեսվում են ամրացման նոր աշխատանքներ։
Քաղաքաշինության և հողի վերահսկողության վարչության պետ Սամվել Ղուկասյանը նշել է, որ վերականգնված հատվածում արդեն ավարտվել են շինաշխատանքները, սակայն ճանապարհի ամբողջական անվտանգությունն ապահովելու համար ժամանակավոր պատնեշները դեռ չեն ապամոնտաժվի։
Ես ոնց հասկանում եմ, ռիսկը ոչ միայն այդ փլուզված հատվածում է, այլ նաև հարակից հատվածներում այդ ռիսկը կա և որպեսզի չունենանք հնարավոր փլուզում նաև ամրացման աշխատանքներ պետք է արվեն հարակից հատվածներում, որոնք որ դեռ փլուզված չեն բայց այդ վտանգը ունեն։ Հետևապես նաև պետք է խնդրեմ հասկանալ որոշակի ժամանակացույց այդ գործողությունների, որպեսզի նաև պլանավորենք, հասկանանք։ Ավարտված են առաջին փուլի աշխատանքները, այն հատվածը, որը փլուզված էր, վերականգնված է։ Հիմա այս երկրորդ փուլի մասով պետք է հաջորդիվ խնդրեմ որոշակի ժամանակացույց տրամադրել, — նշել է Երևանի քաղաքապետ Տիգրան Ավինյանը։
Երկրորդ փուլի շրջանակում հնարավոր է իրականացվի ոչ միայն ճանապարհի ամրացման, այլև լայնացման աշխատանքներ։
Հիշեցնենք, որ Ծիծեռնակաբեդի խճուղին փլուզվել էր 2022 թվականին։ Սահակյանշին» ընկերությունըը Ծիծեռնակաբերդի խճուղու հարակից հատվածում շինարարություն էր սկսել, ահռելի փոս փորել, ինչի հետեւանքով խճուղու երթեւեկելի մի հատվածը փլուզվել էր։