Վարորդական վկայական չունե՞ս. երկրորդ խախտման դեպքում՝ քրեական պատասխանատվություն
Հայաստանում առանց վարորդական վկայականի մեքենա վարելը շուտով կարող է քեզ արժենալ ոչ միայն կրկնակի բարձր տուգանք, այլև քրեական հետապնդում։ Ազգային ժողովում ներկայացվել է օրենսդրական նախագիծ, որը նախատեսում է այս խախտման համար գործող 25 հազար դրամ տուգանքը բարձրացնել մինչև 50 հազար դրամ, իսկ առավել ուշագրավը՝ կրկնվող խախտումը կարող է դիտարկվել որպես հանցագործություն:
Ներքին գործերի նախարարի տեղակալ Արմեն Մկրտչյանը հուլիսի 2-ի նիստին ներկայացրել է վերջին տարիների մտահոգիչ վիճակագրությունը՝ միայն 2024 թվականին առանց վարորդական վկայականի մեքենա վարելու 56 հազար դեպք է արձանագրվել՝ այն դեպքում, երբ 2023-ին այդ թիվը 38 հազար էր։
Տեսնում ենք, որ 1 տարով վարորդականից զրկված անձինք չեն գնում քննություն հանձնելու, չեն ստանում վկայականը, փոխարենը շարունակում են մեքենա վարել՝ վճարելով ընդամենը 25 հազար դրամ տուգանք։ Սա դարձել է մի իրողություն, որի հետևանքով փաստացի ամեն օր փողոցում մեքենաներ են վարում մարդիկ, որոնք իրավական հիմքով դրա իրավունք չունեն։ Սա արդեն սպառնալիք է հանրային անվտանգությանը, – ասաց նա։
Հարց է առաջանում, եթե յուրաքանչյուր երկրորդ խախտման դեպքում անձը ենթարկվի քրեական պատասխանատվության, արդյոք մեր դատական համակարգը պատրաստ է դիադրելու այդ նոր թափով եկող գործերի ալիքին՝ առանց անտեսելու հասարակական ավելի մեծ կարևորություն ունեցող գործերը։