Էջմիածնում կայացավ բռնցքամարտի միջազգային մրցաշար, որտեղ հայ մարզիկները ոսկե մեդալներ նվաճեցին
Էջմիածնի՝ Համլետ Պատուրյանի անվան մարզադպրոցում կայացավ բռնցքամարտի միջազգային մրցաշար, որտեղ հայ բռնցքամարտիկներից շատերը մրցաշարի հաղթողներ դարձան։ Խաչիկ Խաչատրյանին նվիրված բռնցքամարտի մրցաշարին մասնակցում էին նաև Շվեդիայի ու Վրաստանի ուժեղագույն բռնցքամարտիկները։
Մարզադպրոցի տնօրեն Ռոբերտ Պատուրյանը նշում է, որ արդեն երրորդ տարին է, ինչ անցկացվում է այս մրցաշարը, ունեցել են 10-ից ավելի երկրների ազգային հավաքականները։
Հրավիրված հավաքականների կազմում կան անգամ Եվրոպայի ու աշխարհի առաջնության մեդալակիրներ։ Հայաստանի մի շարք մարզերից ևս մասնակցում են մրցաշարին։ Հայ բռնցքամարտիկներից շատերը արդեն մեծ անուն ունեն Եվրոպայում։ Սա շատ լավ փորձ է հրավիրված մարզիկների համար՝ մեր բռնցքամարտիկների դեմ մենամարտելու։
Մրցաշարի հաղթող ճանաչվեց նաև պատանիների Եվրոպայի չեմպիոն, աշխարհի փոխչեմպիոն Սամվել Սիրամարգյանը։ Նա ծանր մենամարտ անցկացրեց, սակայն կարողացավ հաղթանակի նժարն իր կողմը թեքել։
Մրցակիցս ուժեղ էր։ Բարդ մենամարտ ստացվեց, սակայն հարվածների քանակով հաղթեցի։ Կարող էին անգամ դադարեցնել մենամարտը արյունահոսությանս պատճառով, բայց լավ է, որ այդպես չեղավ ու հաղթեցի։
Վերջերս երիտասարդների աշխարհի առաջնությունից բրոնզե մեդալով վերադարձած Ռաֆայել Ներսիսյանը ևս կարողացավ կանգնել պատվո հարթակի առաջին աստիճանին։ Սա նրա առաջին մենամարտն էր մեծահասակների պայքարում և լավ փորձ էր Հայաստանի առաջնությունից առաջ։
Մեծահասակների պայքարում առաջին մենամարտս լավ անցկացրի։ Հաղթանակի հասա հիմնականում տեխնիկայի հաշվին։ Կային խնդիրներ, օրինակ, շնչառությունս, որի վրա պետք է շատ աշխատեմ։
Խաչիկ Խաչատրյանի որդին՝ Արթուր Խաչատրյանը, ով մարզադպրոցի մարզիչներից է, նշում է, որ B դասի միջազգային մրցաշարը շարունակական է լինելու։ Հույս ունի, որ ամեն տարի էլ ավելի կկատարելագործվի, ավելի շատ երկրներ կմասնակցեն ու տարեցտարի կհասնեն նրան, որ A դասի մրցաշար դառնա։
Մեր մարզադպրոցից 10 ներկայացուցիչ ունեինք, որից 7–ը կանգնեցին պատվո հարթակի առաջին հորիզոնականին, երեքը բրոնզե մեդալ նվաճեցին։ Մրցաշարը բարձր մակարդակով անցավ։ Այս մրցաշարը մեր երկիրը մշակույթով ներկայացնելու նպատակ էր հետապնդում։ Մարզչական կազմերը, մարզիկները մեծ տպավորություններով են գնալու։
Մրցաշարի ու իր սաների ցուցադրած մենամարտերի մասին խոսեց նաև Խաչիկ Խաչատրյանը։ Մարզիչը նշում է, որ շուրջ 12 երկրներից ցանկանում էին մասնակցել, բայց քանի որ մրցաշարը ավեի մեծ մասշտաբով ընդունելու հնարավորություն չի եղել, չեն եկել Հայաստան։
Ցանկանում ենք գալիք տարի մասնակից երկրների թիվը հասցնել ութի։ Դա հնարավորություն կտա էլ ավելի մեծ փորձ ձեռք բերել մեր մարզիկներին։ Իմ սաները ապացուցեցին, որ իրենք աշխարհի ու Եվրոպայի չեմպիոններ ու մրցանակակիրներ են։ Ես շատ ուրախ եմ։